Direktor general Les Laplace (d) – potrèt: Belkis Osepa
KRALENDIJK – Bonaire International Airport (BIA) ta buska fervientemente invershonistanan pa konstruí un terminal nobo. Kalkulashon dje kostonan ta por lo pronto 25 mion di euro.
BIA ke konstruí e terminal pareu ku e plataforma nobo finansiá pa gobièrnu di Reino. Esaki a duna di konosé ku no tin plaka pa e terminal tambe. No ta kuestion ku ta gana nos tin di un terminal nobo, asina direktor general Les Laplace ta bisa. “Nos mester di dje pasobra e edifisio aktual no ta kumpli ku eksigenshanan nesesario. Ya nos a yega e kapasidat máksimo di e terminal aki.”
Belkis Osepa ta papia ku Les Laplace
Plaka
E masterplan pa e aeropuerto nobo di Boneiru ta kana te 2023. Gobièrnu di Reino ya a finansiá e pista di aterisahe. E di dos fase dje plan ta un kazèrne di brantwer nobo, un toren di kontrol aéreo i un plataforma. Ya gobièrnu di Reino a reservá plaka pa esakinan. BIA ke pa konstrukshon di e terminal nobo (fase tres) kana pareu ku fase dos.
“Tin kompanianan ku ta mustra interes. Nos ta papiando ku aeroliñanan tambe ku a duna di konosé ku nan ke aportá”, segun Laplace. “Nos mester di invershonnan eksterno pa konstruí e terminal.” BIA ta eksplorando pa wak si nan por haña un finansa sin interes.
Rùber
Segun Laplace no tin garantia ku mas aeroliña lo bula pa Boneiru. BIA huntu ku otro partnernan di aviashon, turismo i gobièrnu konhuntamente mester hasi esfuerso pa haña mas aeroliña. Laplace: Último añanan nos tin un kresementu di 2.6 porshentu pa aña na kantidat di pasahero. Si bo ke sigui krese, mester di mas rùber riba pista.”
Outor Belkis Osepa
.