Christine Alvarez – potrèt: Belkis Osepa
KRALENDIJK – E kantidat di hóben na Boneiru i Sint Eustatius ku ta bebe alkohòl na edat hóben ta krese mas i mas. Trahadó den prevenshon Christine Alvarez di Stichting Verslavingszorg en Psychiatrie (Fundashon Maneho di Adikshon i Sikiatria, trad.) ta papia di un situashon alarmante. “Nan ta mira uso di alkohòl komo parti di e kultura.”
Alvarez ta traha na Boneiru i Sint Eustatius. Último aña e tabata hopi okupá ku lantamentu di un kampaña tokante alkohòl i droga. E kampaña ta kuminsá na yüli na Sint Eustatius den e temporada di karnaval. Entrante e aña di skol nobo Alvarez ta kuminsá riba e dos islanan ku e programa di informashon adaptá pa prevenshon di alkohòl i droga ‘Be Smart’ pa grupo 7 i 8.
Belkis Osepa ta papia ku Christine Alvarez
Na skolnan sekundario tambe Alvarez ta kuminsá ku informashon i kombersshonnan di motivashon. “Tin hóben ku ta bini di famia kaminda ta usa hopi droga i alkohòl” Alvarez ta bisa. “Ta bèrdat ku mi no tin sifra, pero nos ta mira e uso oumentá.”
Uso di alkohòl ta sosodé su dilanti na Playa. Alvarez: Si mi djis sali pafó mi ta mira mucha hòmber den outo ku mariwana i djabièrnè anochi mi ta mira hóben ta kana riba kaya ku bòter di wiski.”
Kultura
Alvarez ta prekupá. Nan ta konsidera e uso frekuente komo normal. “Mariwana nan ta mira komo ‘healing of nature’. Nan tin muchu poko informashon kiko e ta hasi ku bo kurpa i bo konosementu.”
Hulanda Karibense mester alkansá un retraso. Alvarez ta traha den prevenshon na Boneiru i Statia. Na Saba mester manehá e trabou di prevenshon mas aktivamente. “Na Hulanda nan tin sigur trinta aña kaba ta traha riba prevenshon di alkohòl i droga. Aki mester lanta e kampaña na un manera mas profundo i kontinuo pa e trabou di prevenshon bira visibel.”
Outor: Belkis Osepa