Michelle Gumbs – potrèt: Belkis Osepa
KRALENDIJK – Michelle Gumbs di diesocho aña ta desididu di haña su diploma di havo, Si e no logra e aña aki despues di purba un be mas, e ta hasi e èksamennan di estado otro aña.
E no tabata asombrá tokante e resultadonan di èksamen dramátiko na su skol Liseo Boneriano. E mes tabatin un retraso i tabata difísil pa e alkansá esaki den kuater luna. “Biologia a bai malu. Mi konosementu básiko di e materia ei no tabata sufisiente pa e èksamen.”
Belkis Osepa ta papia ku Michelle Gumbs
Michelle ta un di e alumnonan di Liseo Boneriano, e unit di havo/vwo di Scholengemeenschap Bonaire (SGB) ku no a slag mésora pa e èksamen final. E ta spera di haña su diploma di havo ainda despues di purba un biaha ma pa e materia geografia. Di havo 56 porshento di e alumnonan ku a bai òp a slag. E resultadonan di vwo ta mas dramátiko. 33 poshento so a slag.
Miedu
Ainda no ta sigur pakiko asina poko alumno di vwo a traha e èksamen bon. E grupo di alumno di vwo no ta grandi, ma niun alumno ku a puntra no ke bisa kon nan a eksperiensha e aña di skol. Gumbs: “Nan tin miedu di papia. Boneiru tin un skol so di havo/vwo. Otro aña nan mester haña lès di e mésun dosentenan.
Michelle no tin miedu: “Mi ta para tras di loke mi ta bisa.” Na yanüari el a protestá kontra lèsnan di biologia ku tabata kai afó. El a bai prensa, pero despues e skol tabatin un kombersashon pisá kuné. E protesta no ta duel e, e ta haña lástima si ku su protesta a ofendé su dosente. E tin un sifra insufisiente pa biologia i ainda ta lucha ku un retraso di konosementu den e area ei.
Nivel básiko
Despues di e resultadonan dramátiko di èksamen, maneho di SGB a indiká ku nan lo no sigui ku direktor general John van ‘t Hoff. Ademas a kumbiní konsepto di un akuerdo ku ministerio di Enseñansa, Kultura i Siensia (OCW). Mas plaka lo bini disponibel pa enseñansa i kuido di alumno.
Inspekshon di enseñansa ta konkluí den su último rapòrt tokante ‘Mehorashon di Enseñansa na Hulanda Karibense’ ku na skolnan di enseñansa sekundario ainda mester di esfuerso grandi pa trese e kalidat di enseñansa riba un nivel básiko. No ta sigur si lo alkansá e meta na 2016.
Moderno
SGB lo usa e plaka èkstra ku a primintí for di Den Haag pa trayektonan di mehorashon di e skol, segun un deklarashon di e direktiva di skol. Michelle: No tin mester di mas plaka pa Liseo Boneriano. Nos tin klas nobo i e bukinan i aparatonan di mas moderno. Nos tin tur kos. E dosentenan mester komuniká mihó ku e alumnonan i duna lès mihó. Di otro banda e alumnonan mester siña miho kon pa studia e materia.”
Michelle ke men e invershon den didáktika pa e dosentenan i beilès èkstra pa e alumnonan. “Anto espesialmente pa e materianan ku e alumnonan no ta bon den dje”, Michelle ta bisa. Algun alumno mester di ayudo di e dosentenan pasobra nan no por traha independientemente asina bon; otro mester di beilès èkstra.
Djòp
Ku plaka di e djòp ku e tin den banda e mes a paga beiles pa hulandes i geografia. “Esaki a yuda. Mi tabata bon pará pa mi èksamennan di skol. Lastimamente mi sifra final a sali mas abou pa motibu di e sifra di e èksamen sentral.”
Aki Michelle ta trese dilanti ku e ta haña ku tin diskrepansha den e sifranan di èksamen di skol i di e èksamennan sentral. E ta haña e èksamennan sentral hopi mas difísil ku e èksamennan di skol. “Mi ta kere e nivel di e èksamennan di skol mester subi. Pa motibu di e nivel abou bo no sa kiko ta kiko.”
Outor: Belkis Osepa