Foto: Ariën Rasmijn
ORANJESTAD — Parlamento di Aruba a aproba presupuesto pa 2014 cu 13 voto pro y 8 contra. Fraccion di AVP a sostene e budget di gobierno mientras cu ambos MEP y PDR vota contra. Un total di 0 amienda y 15 mocion a wordo entrega, di cual 12 a wordo aproba y 7 unanimamente.
Despues di poco mas cu un siman, e votacion a tuma lugar ayera nochi. A aproba mocionnan pa entre otro urgi gobierno pa integra e asina yama ‘balanced budget rule’ den staatsregeling lo mas lihe posibel, raporta na parlamento regularmente riba finanzas publico y entrega presupuesto y cuenta anual na ora.
Tambe a vota unanimamente pa wak con por yuda studiantenan Arubiano na Hulanda awo cu eynan ta bay introduci e asina yama sociaal leenstelsel cu pa hopi studiante Arubiano lo sali hopi mas caro cu e sistema anterior. Un otro mocion cu a haya sosten unanime ta un cu ta urgi gobierno pa aserca e asociacion di barnan di San Nicolas pa asina yega na un manera pa traslada e prostitutanan cu ta traha eynan for di e area comercial dib San Nicolas na kizas un localidad nobo cu ta mas aisla.
Un mocion di parlamentario Chris Romero di MEP den cual ta puntra pa considera hisamento di e asina yama belastingvrije bedrag pa entrada anual di 20.252 florin pa 30.000 florin, asina dunando esnan cu menos entrada mas poder di compra tambe a gosa di sosten completo di Staten. Mescos ta conta pa unico mocion di Partido Democracia Real, den cual ta pidi gobierno pa traha y presenta un lista di posibel tratadonan comercial y fiscal cu lo bay haya prioridad pa wordo concorda den proximo 2 aña, pa asina wak con mas por purba diferencia economia di Aruba.
Un mayoria di 14 contra 7 a vota na fabor di haci un estudio na crea un via pa cana of core bicicleta na unda aworaki tin un tuberia cu ta core entre e refineria di San Nicolas y e planta di WEB na Balashi. Tambe kier studia transporte di fuel oil di waf di Barcadera pa WEB. Un mocion a cu a wordo desaproba por cierto tabata esun di MEP den cual ta urgi pa aloca placa pa toch por cuminsa cu n un klas nobo di aspirant na Scol di Polis.
‘Tweede toetsing’
Hopi controversial tabata e mocion di MEP cu a pidi pa laga Raad van Advies toets presupuesto un biaha mas despues di entrega e nota di cambio. PDR a sostene mocion aki, pero AVP a bay contra bisando cu no ta logico pa laga otro instancia haci parlamento su trabou. MEP tambe a entrega un mocion urgiendo gobierno pa haci tur cos pa evita cu Valero desmantela e refineria na San Nicolas. Mocion aki tambe a keda desaproba.
Autor: Ariën Rasmijn