Foto: Ariën Rasmijn
ORANJESTAD — Durante su ultimo contestacionnan den debate riba presupuesto pa 2014, prome minister Mike Eman a indica cu antayera compania petrolero Valero, doño di e refineria na San Nicolas cu desde 2012 ta cera, a acudi serca gobierno di Aruba bisando cu nan ta cla un bes mas pa sinta na mesa y discuti futuro di e refineria.
E prome mandatario a declara cu un posibel opcion lo por ta cu en berdad lo bay desmantela. Un otro opcion por ta cu Aruba mes ta tuma e refineria over y ta busca un comprado. Eman den su declaracion tabata cauteloso pa no mustra un preferencia pa cualkier opcion, pero a bisa si cu en berdad tin posibilidadnan hopi grandi pa Aruba cu lo por habri awo. Ela bisa tambe cu kico cu lo pasa lo ta miho cu e situacion den cual e refineria ta aworaki.
Desde cu e refineria a cera, Valero a uza partinan di dje como ‘transshipment area’, unda ta huur tankinan di abastecimento di petroleo na por ehempel compania Venezolano di petroleo PDVSA. For di ceramento di e refneri tabatin diferente opcion pa Valero. Un di nan tabata un cooperacion cu PDVSA. Negociacionnan pa cu esaki a dura lunanan largo pero no a conduci na niun tipo di resultado. PDVSA tabata e compania cu mas a keda menciona, pero for di prome cierre na 2009, diferente compania a wordo menciona, manera Petrobras, PetroChina, Ecopetrol y recientemente PetroTrin.
90 aña
Anteriormente Eman a declara cu durante ultimo lunanan, Valero a aserca gobierno di Aruba dos biaha, bisando cu nan no por haya un cumprado pa e refineria cu ta cera for di november 2012. Pero net ora a cuminsa prepara pa sinta na mesa, un posibel cumprado a presenta su mes y valero a pidi tempo. Awo a sali na cla cu Valero toch kier bay negocia futuro di refineria, aunke prome minister ta declara cu niun momento e compania petrolero a bisa cu e cumprado a hala afo. Toch por bisa den tanto palabra cu esaki probablemente ta marca fin di epoca di refinacion di crudo na Aruba, exactamente 90 aña desde cu Lago a habri su portanan.
Si bay sinta na mesa, gobierno lo nombra diferente comisionnan riba entre otro tereno huridico, di medio ambiente y comercial. E proceso lo ta cuValero ta bin cu proposicionnan riba kico nan ta sinti cu segun ley ta nan responsabilidad na gobierno pa loke ta e tereno y e facilidadnan riba dje. E idea e ora ey ta pa finalmente negocia un pakete completo. Aruba lo bay tin mester di conseho experto den esaki y ta pensando ya caba di envolve entre otro TNO, cu tin su oficina riba e isla.
Autor: Ariën Rasmijn