Entre otro minister di Energia Mike de Meza y Armando Curet dilanti ‘Polar Duke’. Foto: Oficina di Prensa Gobierno di Aruba
ORANJESTAD — Posiblemente awenochi of mayan e tres barconan cu lo haci e exploracion 3D pa gas y petroleo den awanan panort di Aruba ta sali pa laman. Esaki Armando Curet, director di Compania Arubano di Petroleo (CAP) ta confirma.
For di antayera a tene reunionnan preparatorio pa cu e exploracion aki. Preparacion di e barco ‘Polar Duke’ hunto cu ‘Cassandra 4’ y ‘Taraska’ y preparacion di e equiponan di investigacion ta tumando luga y awe e reunionnan aki ta termina cu firmamento di e documentonan den cual tur rekisito y accionnan di partidonan enolvi pa cu diferente aspectonan di e proyecto ta wordo stipula, segun Curet.
Director di CAP ta bisa cu procedimento di e exploracion aki ta mescos cu esun 2D cu a tuma aña pasa, den cual cablenen di 8 kilomenter largo ta wordo pasa riba fondo di lama. Diferencia grandi ta si cu hopi mas datonan ta bay wordo acumula e biaha aki. Ademas ta asina cu e barconan ta bay explora exclusivamente un zona di 3.200 kilometer cuadra riba un distancia di 10 kilometer panort di Aruba.
Aña pasa a haci un sondeo tambe den area pazuid di e isla, pero segun Curet e area panort tin e miho indicacionnan cu tin posibilidad di gas of petroleo bou suela di laman. ‘Polar Duke’ ta parti di e flota di gran capacidad seismico di compania Dolphin Geophysical. E barco a wordo construi na 2010, ta 106.8 meter largo y ta pisa casi 7.7 ton.E dos asina yama ‘seismic guard vessels’ ‘Cassandra 4’ y ‘Taraska’ ta preveni cu otro barconan grandi por stroba e investigacionnan.
Repsol
Investigacion aki ta tuma luga riba orden di compania petrolero Spaño Repsol cu tin e consecion pa explora pa gas y petroleo den awanan teritorial di Aruba. Recientemente Shell a cumpra parti di Repsol, cu na su beurt tambe recientemente a incorpora British Gas di Inglatera y Total di Francia. Investigacion den awanan teritorial di Aruba ta costa Repsol entre 35 y 40 miyon dollar y ta bay dura te oktober of – dependiendo di con lihe e trabounan ta bay – un tiki prome cu esey.
E intencion ta pa bay traha 24 ora pa dia, 7 dia pa siman. E personal den e sala di investigacion ta traha shifts di 12 ora monitoreando, grabando y analisando loke e mashinnan ta capta. E personal ta keda abordo di e barco pa periodonan rotativo di cinco siman cada un. Despues di e tres luna na lama, ta procesa e data pa mas of menos 9 luna. Esaki kiermen cu te otro aña lo tuma un decision si ta bay haci perforacionnan di prueba, cual lo ta hopi mas intensivo y costoso.
Autor: Ariën Rasmijn