Inspektor-general Joe Alcalá
WILLEMSTAD – “Na islanan BES ta midi kuido ku midí hulandes, pero aki no ta Hulanda. Ta Kòrsou mester disidí kua kuido ta adekuá pa 150 mil hende.” Asina inspektor general suplente Joe Alcalá ta bisa den un reakshon riba e debate di e komishon di Tweede Kamer pa Relashonnan den Reino djabièrnè último.
Minister Edith Schippers di Salubridat Publiko a pone un prohibishon riba mandamentu di pashèntnan di BES pa Sint Elisabeth Hospitaal (SEHOS) na Kòrsou. E ta bisa ku e ta basa esaki riba konseho di Inspekshon hulandes di Salubridat. “Inspekshon ya tin dos aña kaba ku no tabatin aktividat huntu ku Inspekshon hulandes riba e tereno di supervishon. E último bishita for di Hulanda tabata na 2012 di inspektor Jan Wijngaarden”, segun Alcalá.
E no ta na altura di un konseho resien di Inspekshon hulandes. Alcalá no ke papia tokante e echo si kuido na SEHOS no ta adekuá, manera Schipper ta bisa. “Ta un totalidat. Mester invrtí den hende i e struktura di organisashon i mester wak kiko tin plaka disponibel p’e.”
No tin inspektor
Tanten lunanan largu kaba Kòrsou no tin inspektor di Salubridat Públiko. Segun Alcalá a proponé un hende si pero minister mester disidí ainda. E no por bisa ki ora esaki lo sosodé. Tin krítika riba Inspekshon di Salubridat basta tempu kaba. Trato di keho ta tarda pa motibu di falta di personal; tin keho ku tin mas ku un aña kaba serka inspekshon i diferente pashènt i famia di pashènt defuntu a bati alarm.
Durante e debate e parlamentarionan Ronald van Raak i Hanke Bruins Slot segun Antilliaans Dagblad ta pone énfasis riba e funshonamentu di e speshalistanan médiko, ku ta “usa hòspital manera un saku di plaka” i ta “kue djap tur ku tin pa nan propio kompanianan”. Nena Abbad, presidente di Asosiashon di Speshalista Médiko Kòrsou (VMSC) ta bisa ku el a lesa esaki masha sorprendí.
“Ya ta di dos be kaba ku minister Schippers, referiendo na ‘informashon resien’ ku hopi aplomo ta kousa komoshon tokante kalidat di kuido médiko na Kòrsou. Promé be tabata durante un bishita di trabou na Boneiru den kuminsamentu di 2012. Pero na 2012 i aktualmente ta trata di e mésun rapòrt, esta un rapòrt di inspekshon di 2007 ku Inspekshon hulandes a traha. Despues di 2007 no tabatin niun raportahe nobo mas ainda”, Abbad ta bisa.
Struktura
“Nos no por ta di akuerdo niun tiki ku e ponenshanan di Ronald van Raak i Hanke Bruins Slot. Nan komentarionan solamente ta mustra kla ku nan tin tiki konosementu di struktura di kuido di salubridat di Kòrsou.” Pa loke ta e prohibishon pa manda pashèntnan di BES pa SEHOS Abbad ta bisa: “te ainda ku hopi regularidat nos ta haña pashènt for di Boneiru. Nunka esaki no tabatin un interupshon”
‘Notisia bieu’
Direktor médiko di SEHOS Cai Winkel den un reakshon kòrtiku ta laga sa ku e remarkenan tokante un prohibishon di mandamentu di hende pa motibu médiko for di BES ta ‘notisia bieu’. “Esaki ta e kaso shete aña kaba i semper nos tabatin pashènt di islanan BES.”
Konseho di atministrashon di hòspital pa medio di un komunikado di prensa a laga sa ku ta rechasá e ponensha di Den Haag: “Apsolutamente no ta bèrdat ku kalidat di kuido último añanan lo a bai atras so i por prueba ku echo ku por rechasá esaki. E desishon tempunan ayá di un minister hulandes pa no manda pashènt di Boneiru pa trato médiko pa SEHOS ta basá riba un rapòrt di inspekshon bieu di 2005 i 2008. E desishon aki ta konosí serka hòspital i a pone e minister na altura di e plannan pa mehorashon di SEHOS.”
Outor: Leoni Leidel-Schenk