KRALENDIJK – Whisky, Polar, Smirnoff, Hennessy, Amstel i Bacardi 151. Lo bo kere ku si un hende por menshoná e markanan di alkohòl aki den un bia, ku tur probabilidat e ta bon konosí ku alkohòl.
Algun hóben di diessinku i diesseis aña na Boneiru por hasi esaki. Nan ta usa alkohòl djis pa tin ‘fun’ òf komo stimulansa pa sèks. Un grupo di ocho hóben ta sinta na un plenchi na Kralendijk. Nan ta konta poko bou harimentu, pero tòg no reservá, di nan eksperenshanan ku alkohòl. “Sin alkohòl bo no tin plaser”, asina Roxianna di diessinku aña ta bisa. “E ora ei mi ta sintimi bon i happy.”
Problema
Giomar tin diesseis aña i no ta bai skol mas. Ku kurashi e ta konta ku e ta bebe hopi. “Alkohòl ta bon. Mi tin gana di dje.” Despues ku a sigui pruntra e kontesta berdadero dikon e ta bebe ta bin dilanti: “Mi tin hopi problema personal.”
E eksperenshanan di e hóbennan aki no ta otro for di otro lugá na mundu. Hóbennan ta bebe relativamente mas alkohòl. Entrante promé di yanüari Hulanda a kambia si lei di bebida i hóreka pa kontraresta uso eksisivo di alkohòl. No tin mag de bende alkohòl na hóben bou di diesocho aña. Si nan tin alkohòl den nan poder, nan ta kastigabel. Asta no tin mag di bebe un serbes riba kaya, den un parke òf na snèk.
No ta konosí si ta ehekutá e lei aki na Boneiru, Saba i Statia ku for di 10 di òktober 2010 ta forma Hulanda Karibense. Giomar no ke papia di su problemanan. Niun hende no ta strob’é pa kumpra alkohòl. E tin diesseis aña, pero parse diesocho. E ta na kas, ta kohé debesenkuando un djòp i ta bebe.
Informashon
Christine Alvarez, trahadó di prevenshon na e fundashon di kuido pa adikshon i sikiatria ta bisa ku e uso di alkohòl bou di hóbennan na Hulanda Karibense ta alrmante. Sifra e no tin. Pa medio di opservashon e ta mira ku e uso ta krese. Den e aña eskolar benidero Alvarez lo kuminsá ku un kampaña di informashon pa muchanan di skol básiko i tambe lo duna informashon na skolnan sekundario. Otro aña tambe e ta kuminsá ku un investigashon tokante uso di alkohòl i droga.
Bira malu
E hóbennan ta mira nan uso di alkohòl komo normal. Meskos ku na otro pais, tambe na Boneiru tin hóben ku ta resultá den hòspital pa venenamentu ku alkohòl. Mauricio di diesseis aña tambe ta kòmbersá tokante e tópiko. E no ta bebe mas. El a hasi esei si for di tempu e tabatin dieskuater aña. “Algun tempu pasa mi a bira basta malu. Mi mester a keda un dia den hòspital. Kiko mi a bebe? “Un tiki di tur kos.”
Roxianna ta haña ku alkohòl ta nesesario pa tin plaser. I e ta bon pa sèks, asina un mucha hòmber di diessinku aña ta konta. “Bo por hasi sèsk mas largu.” Nan ta duna di konosé ku nan sa ki efekto uso di alkohòl tin riba nan kurpa. “E ta kaba ku bo kurpa”, asina un ta bisa. “E ta malu pa bo nirnan”, un otro ta kontestá. Nan no ta parse di ta wòri masha.
Pa privasidat di e hóbennan a usa otro nòmber
Outor Belkis Osepa