Glenbert Croes na Club Trappers na Santa Cruz. Foto: Ariën Rasmijn
ORANJESTAD — Mayan mainta pa 10’or, prome minister Mike Eman ta bishita gobernador Fredis Refunjol.
E idea ta pa purba convence gobernador pa firma presupuesto 2014 y duna su malcontento pa loke ta hecho cu gobernador no a haci esaki ainda.
Ayeramainta na radioemisora Canal 90, e noticia a sali cu tin un desacuerdo riba ken lo representa Aruba den e comision cu lo investiga presupuesto prome cu gobernador firme. Por cierto, no tin bista riba si of ki dia representantenan di College Financieel Toezicht (CFT) lo bin Aruba.
Nan biahe for di Corsou a wordo cancela dialuna ultimo, mirando cu e acuerdo cu Aruba y Hulanda tin pa investiga presupuesto di 2014 no ta mas cu seis punto den un comunicado di prensa emiti pa VNO. Tambe a anuncia cu prome minister lo bishita gobernador awemainta. For di eynan e idea a surgi pa sostenedornan di gobierno acompaña Eman y manifesta dilanti gabinete di gobernador. For di otro banda di espectro politico, e asina yama Grupo di Shete – cu tin hopi sosten den partido MEP – a reacciona riba expresionnan haci na radio dor di bisa cu nan tambe ta bay subi caya mayan.
No tin permiso
Alto comisario Dolfi Richardson ta bisa cu pa niun di dos manifestacion a drenta un pedido pa permiso. Polis a haya sa si di e plannan via rednan social y radio. E plan di polis awo ta pa na prome instante mira con cos ta bay. “Semper tin cu wak e situacion. Nos ta trahando awo cu nos draaiboek y den un draaiboek semper bo ta traha cu cierto scenarionan. Pa nos mes nos a pone cierto liñanan di tolerancia cu nos lo aplica.”, asina Richardson ta splica. Si yega na un confrontacion entre dos grupo di manifestante, polis lo tin cu re-establece orden publico, segun alto comisario.
Grupo di Shete
Mientras tanto, ayeranochi Grupo di Shete a tene un reunion na Club Trappers na Santa Cruz. Eynan entre otro parlamentario di MEP Glenbert Croes tabata presente pa duna un discurso. Mester bisa cu ayera lider di MEP Evelyn Wever-Croes a anuncia cu MEP lo no participa na manifestacion di Grupo di Shete awe. Glenbert Croes di su banda ta bisa cu e ta sostene esaki pero si lo ta presente como ciudadano. Mester bisa tambe cu Club Trappers tabata yen simpatisante di partido geel.
Bon Dia Aruba a haya di compronde cu probablemente lo bay dicidi pa no manifesta na mesun ora cu sostenedornan di gobierno. “Grupo di Shete kier ta responsabel”, asina Croes ta bisa Bon Dia Aruba. “Y ami lo urgi nan pa warda cu e manifestacion te despues cu Rijksministerraad dicidi mayan atardi si Aruba haya un aanwijzing y si esaki lo bay ta permanente of temporal.”
Reunion
Presidente di Parlamento Marisol Lopez-Tromp ta bisa Bondia Aruba cu awe tabatin e plan pa debati riba entre otro retiro di Juan David Yrausquin como minister y situacion cu gobernador. E ta tuma na cuenta – considerando mas tanto aspectonan di siguridad – pa move reunion di urgencia aki pa un otro datum.
Autor: Ariën Rasmijn