KRALENDIJK – Insel Air ta hasi esfuerso pa pone un paro na retraso i kanselashon riba ruta pa Boneiru, di akuerdo ku direktor Edward Heerenveen di Insel Air. Pero na Boneiru taksistanan ta teme ku retraso i kanselashon tin efekto riba turismo. Tambe Ofisina di Turismo (TCB) ta ripará e efekto indirekto di e retraso i kanselashon di buelonan di Insel Air.
Taksista Aythel Isidora ta sinti e efekto di retraso i kanselashon di buelonan di Insel Air den su saku. E ta aún masha skèrpi ku su keho: “Insel Air ta mata turismo di Boneiru. Tin turista ta bisami ku si ta ku Insel Air nan mester bula, nan no ta bin Boneiru mas.”
Pèrdè tempu
Tin pasahero ta pèrdè bastante ora promé ku e yega su destinashon. Tambe tin reklamo riba e konekshon entre Aruba i Boneiru. Mester pasa Kòrsou via Kòrsou. Segun Isidora e tempu di fakansi di e turista ta bira mas kòrtiku.
Isidora: “Tin ora mi tin ku para warda un pasahero. Ora e bin tres ora mas lat mi mester bolbe bin busk’é. Ken ta pagami e tres oranan ei?”Tambe taksista Ricardo Cecilia ta tende reklamo di turista. “Nan no ta yega nan destinashon na ora. Ora nan tin un buelo di konekshon nan no ta haña kontesta satisfaktorio di e aeroliña.”
Motibunan
Direktor Edward Heerenveen di Insel Air no ta desmintí ku tin retraso. “Tabatin motibu pa esakinan. Nos no por a haña avion pa remplaso.” Dor ku Insel Air tabatin avion den chèck pa problemanan tékniko, mester a re-skèdjel buelonan. Tambe pa motibu di finansa ku tabata pega na Venesuela, segun Heerenveen.
Insel Air ta tuma kontakto ku pasaheronan den kaso di retraso i kanselashon. Heerenveen: “Nos ta bèl. Nan no ta na aeropuerto na momentu ku e buelo mester a sali. Ta papia di retraso ora avion ta mei ora of mas lat. Retrasonan ta tuma lugá rònt mundu.”
Protehá biahero
Pasahero Angelo Trapenberg ta biaha tur siman riba djaluna i djabièrnè entre Kòrsou i Boneiru. “Ningun hende no ta responsabel. E kliente ta keda ku e problema. E ta asinaki for di dia no tin kompentensha mas. Tur bia mi ta yega mi destinashon lat.”
Trapenberg tin elogio pa e personal di Insel Air na Boneiru. “Nan ta hasi nan esfuerso i trata pa yuda, pero no sa unda e avion ta. Mester bin regla pa protehá e biahero ku ta paga su pasashi.”
Tambe un studiante di Universidat di Kòrsou na Flamingo Airport ta komentá: “Tin ora e avion tin retraso i tin ora e ta na tempu. Mi sa kai lat pa skol.”
Dos Fokker-50
Heerenveen ta spera ku denter di dos siman e problema di retraso i kanselashon pa i for di Boneiru ta pasa pa istoria. Ya kaba tin mehorashon. “Nos lo haña denter di pronto dos Fokker-50 èkstra riba e ruta di Kòrsou-Boneiru. Total ta bira sinku aviòn riba e ruta. E kapasidat ta subi ku shen porshentu i lo tin back-up tambe.”
TCB
Ofisina di Turismo di Boneiru ( TCB) tambe ta tende diariamente di e reklamonan di pasaheronan for di Kòrsou. Direktor Ethsel Pieternella di TCB ta bisa ku for di dia a pèrdè dos aeroliña ku ta bula interinsular, TCB a ripará ku kapasidat di e aeroliña ku si tei no ta sufisiente. “Tin retraso i por sosodé ku asta bo mester keda drumi na Kòrsou.” E ta afekta e kalidat dje biahe, segun Pieternella. “Niun hende no ke sinta warda sinku te seis ora. Esei a pasa ku mi mes i nos trahadonan.”
Pieternella ta bisa sí ku e retraso i kanselashon tin efekto indirekto, pero no direkto. Turismo di Boneiru no ta dependé di e fluho di pasahero entre Kòrsou i Boneiru. Gran parti di Boneiru su turistanan ta bin riba e buelonan dirèkt for di Oropa i Merka. “E kantidat di pasahero ku a baha for di Kòrsou ta mas bien hendenan lokal ku ta biaha ménos dor di preis haltu di tíket i avionnan yen.”
Sí TCB ta haña reklamo di turistanan ku ta biaha interinsular. E ofisina di turismo ta trata na rekompensá algun turista pa nan no bai bèk desapuntá. “Mester realisá ku hopi biaha turista ta bin for di leu. Nan ta pèrdè tempu di fakansi.” Pieternella tin komprenshon pa Insel Air. E ta spera ku e kompania di aviashon ta solushoná e problaman ma slihé posibel.
Eksaherá
Papia tokante konsekuenshanan pa turismo di Boneiru Heerenveen ta haña eksaherá. E kantidat di turista ku Insel Air ta transportá ta mayoria hulandes ku ta biaha ku KLM i Arke Fly bèk pa Hulanda. Pa loke ta trata turistanan ku supuestamente ta keda pegá na Kòrsou òf visa versa: “Nunka nos no a laga hende keda sin bai su destinashon dia ku e mester a yega. Asta ta transportá pasaheronan riba buelonan te lat, ora tin retraso. Nos ta splika e turista kiko e problema ta i en general tin kompreshon.
E direktor no ta kòrda di niun kaso ku turista a keda drumi Kòrsou. “Si akaso mester keda drumi Kòrsou mes, nos ta paga hotèl.”
Outor Belkis Osepa