Minister Mike de Meza na palabra dilanti Fort Zoutman – foto: Ariën Rasmijn
ORANJESTAD — Gobierno di Aruba, gobernador Fredis Refunjol y Gobierno di Hulanda ainda no a yega na otro pa loke ta un acuerdo nobo riba presupuesto 2014.
Mike de Meza a duna un discurso emocional den cual el a duna di conoce cu Hulanda ariba un par di puntonan ta keda ‘intransigente’.
Scucha discurso di minister De Meza
” Nos a splica hopi cla cu hamas nos lo laga un pais of un persona kita nos autonomia. Nos ta para pa nos autonomia y pa cumplimento di nos leynan”, asina De Meza a splica. Segun e mandatario, gobierno lo a ofrece pa reuni cu gobernador y a contribui diferente opcion, pero tin desacuerdo ainda riba un par di punto cardinal. E mandatario y prome minister interino no kier a bay den detayes pero a keda mantene den su discurso cu gobernador tin cu firma presupuesto 2014. Mayan mainta ta spera un respuesta for di gobierno Hulandes.
Branson y Balkenende
For di mainta caba reunionnan a tuma luga non-stop den gabinete di gobernador. For di diasabra caba ta purbando di yega na otro riba nivel di ambtenaar. Prome minister Eman mes a sali ultimo biaha for di su tent despues di 6’or. Den un entrevista na radio el a duna di conose entre otro cu e ta conmovi cu e apoyo cu a bin for di Richard Branson via Twitter y for di Jan-Peter Balkenende den prensa Hulandes. Tambe ex-prome minister di Corsou Etienne Ys y prome minister di St. Maarten Sarah Wescott a bin bishita prome minister pa duna apoyo.
Menazanan
Mientras tanto, Ministerio Publico lo ta investigando expresionnan haci na radio den ultimo dianan na unda lo a menasa gobernador Refunjol. Vocero Ann Angela no kier confirma esaki, pero ta bisa si na nomber di fiscal mayor Peter Blanken cu OM ta hopi preocupa pa loke ta tipo di expresionnan asina, y cu ta monitoriando e situacion.
Cruzamento di caya
Un poco prome cu 6’or movecionnan a intensifica ora tur minister presente a cruza caya y drenta edificio di gabinete. Esaki lo a tuma luga riba nan propio iniciativa na unda nan a pidi gobernador pa reuni den su oficina. Eyden ministernan y gobernador Refunjol a keda debati cu otro. Reunion a sigui te anochi ora ministernan a sali for di gabinete di gobernador. Por a nota na e expresion di cara di e ministernan cu partidonan ainda ta leu di yega na otro.
Poco despues secretaria di Conseho Hoevertsz y consehero Arends a cruza caya dos biaha, sin duna niun declaracion na prensa. Na dado momento a sali na cla cu Ven Eman, ruman di prome minister, tabata serca gobernador. E representante di Rey lo a invite pa un combersacion informal. Ora gobernador a sali for di su oficina pa subi su auto y bay cas, el a sali cu Ven y a brase pa despues bandona e sitio.
Sostenedornan un biaha mas a yame pa traidor y a exigi pa e firma presupuesto. Ven Eman despues a duna un declaracion cortico, bisando cu gobernador a dune e mensahe pa bisa prome minister Eman cu e ta sumamente preocupa pa su salud. Ven Eman despues a drenta tent di su ruman pa dune e mensahe personalmente.
Autor Ariën Rasmijn