E rumornan ta ku lo ta un likidashon entre dos banda kriminal – potrèt: José de Bruin
WILLEMSTAD – A tira dos hòmber mata awenochi dilanti salida di Hato, e aeropuerto di Kòrsou. Diferente hende, entre nan turista, a haña herida den e tiroteo ku a tuma lugá banda di kuartu pa ocho ora ku pasahero a yega ku e kompania aleman Air Berlin.
Katinga van Horssen tabata pará na salida ta warda su yu hòmber, ora ku el a tende tiramentu su tras. “M’a kere ta vürwèrk. Mi suegu a drei wak i a mira un hòmber kai abou. E ora ei nos tambe a kai drumi abou pasobra e tirunan tabata sigui numa. Ora nan a stòp nos ker a lanta ma e tiramentu a kuminsá di nobo. Un hòmber banda di e salida tabata heridá gravemente. Mi no sa si e ta na bida ainda. Ora e tiramentu a bolbe stòp nos a kore bai paden.”
Sine di guera
Únabes paden Van Horssen a topa ku dos turista drumí abou gravemente heridá. “Tabatin un muhé abou na suela i mi a mira un mucha hòmber tambe gravemente heridá. Tabata manera ta un sine di guera mi tabata mirando. En todo kaso mi sa ku ta turista nan ta, di e hòmbernan pafó mi no sa”, Van Horssen ta bisa ku un stèm ku ta tembla. E tin dos aña bibá riba e isla, ma no ta promé tiroteo ku el a presensiá. “E dia riba e tereno di parker na Mambo Beach tambe mi tabata t’ei, pero no asina serka manera awe.”
Potrèt: José de Bruin
Ambulansnan ta kore bai bini pa Hato, a sera e kaminda kompletamente. Hòmber den trahe blanku ta kana rònt di e kurpa sin bida di e hòmber i ta pone bòrchi banda di e hùlsnan di bala ku tin rondo di e kurpa. Fiskal mayó Heiko de Jongh i fiskal Guillano Schoop ta deliberá ku e tim di polis presente. Ainda no ta duna informashon ofishal. “Nos no por bisa nada ainda, nos ta warda informashon di poliklínika tokante e víktimanan, ainda nos no sa kuantu nan ta.”, bosero di polis Alfred Suares ta konta.
Farley di e sportsbar na Hato tampoko no ke bisa nada. E ta sera su kortinanan di ròl mekániko i e ta bai kas. “E tiramentu no ker a stòp, turistanan tabata grita, e kos no tabata stòp. Mi no ke papia aworaki. Podisé mañan.” Hopi emoshona e ta kana pasa e sintanan ku ta marka e esena. E avionnan ku yega ta laga nan pasaheronan sali aeropuerto via un otro salida. Ounke ku tin hopi hende di polis, e tim di investigashon i Ministerio Públiko, ta reina un silensio mortal na e aeropuerto.
Rumor
Na e mirador kant’i e kaminda di bai aeropuerto tin un fila di outo ku a para. Deprimí hendenan ta para wak e investigashon na un distansha. Tin rumor ku lo ta un likidashon entre dos banda di e barionan Buena Vista i Koral Specht. Lo a tira Jais Juliana, kabesante di un banda di Buena Vista, mata. E likidashon lo ta relatá na droga pero no a konfirmá esaki. Polis i OM a palabrá ku nan lo sali ku informashon ora ta kla ta kiko a sosodé na aeropuerto.
Outor Anneke Polak