Morto despues di likidashon na Hato – potrèt: José de Bruin
WILLEMSTAD – E aña aki na Kòrsou por lo ménos dies persona a bira víktima di likidashon i ayeranochi aeropuerto internashonal di Hato tabata un esena di horor. E aeropuerto ku su kolonan alegre a kambia bira un área di guera ku hende ta grita, ambulansnan ku sirena tabata kore yega i tabatin yen di hùls di bala abou, despues ku un likidashon bon planeá ku arma outomátiko a tuma lugá, ku por lo ménos dos morto i shete herido komo konsekuensha.
“E imágennan aki ta pasa rònt mundu”, un trahadó di seguridat na Hato di 26 aña di edat ta konta. Ayeranochi e tabata liber i awe e ta traha atrobe. “Nos no por prevení ku algu asina ta sosodé i esei ta duna mi miedu. Polis nòrmal i seguridat ta sin poder kontra e likidashonnan aki.”
Kuminsamentu di mart un asesinato strabagante a tuma lugá riba e isla. Dos hende ku tabata keiru a haña dos kurpa kompletamente kimá den yerbanan na Baya Beach. A resultá di ta e kurpanan sin bida di dos hòmber drumi riba nan barika ku nan brasanan mará.
Tres asesinato mas
Dos siman despues a sigui un historia di mas horor. Den oranan di meinta a deskubrí dos kurpa sin bida riba e kaminda entre Kunuku Aqua Resort i Bullenbaai. Tabata di un mucha muhé di 23 aña i un mucha hòmber di diesshete aña. E anochi despues ku a deskubrí e kurpanan tabatin un mas asesinato den e kaya di e mayornan di e mucha muhé. Hòmber den un outo a tira DJ Renzo Soleano den su kurá i el a muri despues na hòspital.
Asistensia
Minister di Hustisia Nelson Navarro ta indiká ku probablemente e asesinatonan ta relatá na droga. “Kòrsou mester tene kuenta ku lo tin mas likidashon e tempu binidero”, el a laga sa anteriormente. Pa kombatí kriminalidat fin di mart a buska asistensia di Hulanda. Hulanda a manda un funshonario di polis haltu pa e isla pa bin sostené e hefe di Kuerpo di Polis Kòrsou (KPC). Tambe lo tabata traha riba un ‘enfoke konkreto’ di kriminalidat na Kòrsou.
Ruta di droga
Un problema grandi den e lucha kontra droga ta ku Kòrsou ta popular komo stashon di tránsito. Den un rapòrt di Ministerio di Hustisia di 2007 por lesa kaba ku esaki ta e kaso: “Ta trese e cocaina i heriona Kòrsou for di pueblo chikí na kosta di Venezuela ku go fast i ku barku chikí di karga ku ta usa pa trese piska i fruta. For di Kòrsou ta hib’é Oropa ku avion”, e rapòrt ta bisa.
‘Falta di liderasgo’
State Department, ministerio di Asuntunan Eksterior di Estádos Unídos, den un rapòrt tokante 2012 a konkluí ku Kòrsou ta hasi masha poko pa kombatí droga. Ainda e isla no tabata disponé di ‘e kapasidat pa enfoká kriminalidat relatá na droga na un manera efektivo na den su interior’. “Un falta general di liderasgo tabata un di e faktornan ku a kontribuí na un éksito minimal di kombatimentu di droga na 2012”, asina e departamento a kritiká.
E kantidat no a subi
Segun Ministerio Públiko e sifranan ofisial no a subi. Den e raportahe anual di 2013 por lesa ku e kantidat di sospechoso di kriminalidat di droga a baha kompará ku 2012. Tokante e último lunanan poko ta konosí ainda. Segun bosero Norman Serphos esaki por ta pasobra ainda no tabatin detenshon den e kasonan ei. “OM ta kai aden den un kaso despues di un detenshon, pero ami mes no ta ripará un oumento den kasonan relashoná ku droga. Loke nos tin hopi aktualmente ta un guera di banda”, Serphos ta bisa.
Riesgo
E trahadó di seguridat na Hato ta spera riba akshon pronto pa asina e por sinti su mes mas seif na trabou. “Ta opvio ku Kòrsou no por hèndel e kos aki. Mi ta spera ku gobièrnu lo no laga nos kore riesgo pòrnada mas tantu tempu.”
Outor: Elisa Koek