Minister Nelson Navarro – potrèt: Dick Drayer
WILLEMSTAD – E trato riba kontenido di e kaso Magnus lo tuma lugá na stathùis. No na kazerne di marina na Suffisant ni na base di marina na Parera. “Presidente di Korte no ke situashon afgano”, minister di Hustisia Nelson Navarro ta splika.
Al fin al kabo ta presidente di Korte ta esun ku ta disidí. “A deliberá na tempu ku ministerio di Defensa. Pero nan tin un protokòl kaminda tin seguridat ekstenso. E wes di e seshon i presidente di Korte no ke e tipo di ‘situashon afgano’ aki i a bisa ku nos no tin nodi di bai asina leu. Entretantu tempu a kuminsá pèrta i presidente di korte a tuma e desishon”, Navarro ta splika.
‘Muchu poko personal’
Korte mes ta duna un otro splikashon. “A resultá ku pa e siman ei no tin sufisiente personal disponibel pa ekipá Suffisant. Ta tereno di defensa i ei ta marechaussee ta enkargá ku seguridat. Pa e siman ei tabatin muchu poko hende disponibel. Ta ferfelu ma no ta otro”, wes di prensa Mauritz de Kort ta splika. Marechaussee ta referí hende pa Defensa pa splikashon, Defensa di su parti ta referí hende pa Korte.
Kapas di tur kos
Minister Navarro ta papia e kos bon kla: “Sigur sigur, lo m’a preferá un otro solushon. Mi ta prekupá sigur sigur pa seguridat, pasobra nos sa ta di ki kaso grandi ta trata i ki tipo di hende ta envolví. Si nan por asesiná un parlamentario di dia kla, nan ta kapas di hasi tur kos.”
Dia 4 di ougùstùs e trato di kontenido di e kaso Magnus ta kuminsá, kaminda kuater sospechoso di e asesinato di Helmin Wiels lo parse dilanti wes. E trato di kontenido aki lo dura un siman, i lo tené na stathùis na Punda mes numa. No ta Navarro so ta prekupá p’esaki, partido di koalishon PAIS tambe entretantu a hasi diferente apelashon pa kambia e lugá aki ainda.
Bista di turista
PAIS ta premirá problema di tráfiko den sentro pasobra tin hopi interes pa e kaso. Ademas e kos no ta keda nèchi pa bista di turista, asina Alex Rosaria i Mike Franco ta bisa. Pero ta presidente di Korte tin último palabra, i te ainda no ta parse manera e ke kambia su desishon.
“Nos ta hopi okupá ku e konsekuenshanan logístiko i di personal i e retonan ku bo tin relatá na seguridat”, de Kort ta konta. Riba e pregunta ku no por a solushoná e problemanan di personal na marechaussee e ta kontestá: “A wak e opshon si pa tene e seshon mas lat, pero nos ta haña nos ku limitashon legal. Pa kambia pa un fecha mas lat defensa mester koperá. Despues di deliberashon ku e abogadonan di defensa a disidí di tene e seshon dia 4 di ougùstùs mes pa motibu di opheshon logístiko i personal.”
Opheto
Den e seshon anterior di e kaso Magnus, na desèmber di aña pasá, un di e bishitantenan lo a trata di hiba un opheto paden ku no ta pertenesé ei. Korte no ta bisa di ki sorto di opheto ta trata. “En berdat polis a haña algu serka un hende, na final esaki no a drenta e sala. A evaluá tur seshon ku polis i Vrijwilligerskorps Curaçao i for di esei a sali ku e medidanan ku a tuma ta sufisiente”.
Outor: Anneke Polak