Cerilio Soleana – potrèt : Belkis Osepa
KRALENDIJK – Cerilio ‘Iyo’ Soleana di 17 aña e aña aki ta biaha pa Arizona. E ta kuminsá su karera profeshonal komo pelotero den e klup di beisbòl Major League Cincinnati Reds. Un potrèt di un hóben bonerianu ku sa kiko e ke. “Mi ke mustra kiko mi por.”
Fo’i na chikitu Cerilio Soleana tabata hunga beisbòl den wikènt na e kunuku serka su wela i tawela. Mama Mirla Soleana ta bisa esaki di e ambishon di Cerilio pa bira pelotero profeshonal: ‘E tabata drumi i lanta ku beisbòl den su kabes. Tur loke ku e hasi ta konektá ku beisbòl.’
Belkis Osepa ta papia ku Cerilio i su mama
Ehèmpel
Su ruman hòmber Quintin Soleano ta su ehèmpel grandi. Quintin a bai dilanti di Cerilio i a kuminsá hunga beisbòl pa Repúblika Dominikano. Pero no a prolongá su kòntrakt i el a bini Boneiru bèk. For di e tempu ei Quintin ta sostené su ruman di mas chikí pa laga su soño bira realidat. Cerilio: “Kasi semper mi tabata wak e weganan di Major League Baseball (MLB) na televishon. I tur be mi ta bisa mi mes ku ta riba e nivel aki mi ke hunga beisbòl. Mi a trein masha duru p’esaki.”
Potrèt: Eric Soleana
Cerilio a logra. Dia 8 di yüli na Boneiru, den kompania di su scout Fermin Coronel, mayornan famia i konosí, el a firma un kòntrakt ku e klup profeshonal merikano di baseball Cincinnati Reds. E firmamentu ta un evento memorabel pa e isla, pasobra ta promé be ku un bonerianu ta firma un kòntrakt di beisbòl na kas. “M’a sinti mi hopi trankil e dia ei. Tabata huntu ku mi famianan, nan tabata t’ei pa sostené mi.”
Dream Big
Cerilio su aire ta trankil i spontaneo, pero e ta modesto tambe. Asina e papia bo ta tende kon sigur di su mes e ta. Su mama Mirla ta konfirmá esaki. “El a siña mi wak beisbòl. Semper e tabata bisa: ‘Mama mi ta ‘dream big’ (mi ta soña grandi). Un dia mi tambe ta para picha einan.’ Asina mi a prepará mentalmente riba Iyo su desishon di bai hunga beisbòl profeshonalmente. Mi ta mir’é para ei kaba na e kaminda di picha. Kiko ku e hasi, mi ta pará su tras.”
Na Arizona e treinennan i e weganan di Cincinnati Reds a kuminsá kaba. Cerilio ta kuminsá te abou komo ‘rookie’ pa sigui subi te na e nivel di mas haltu, MLB. Ta ei e ke yega. E por? Bai Merka su so? Cerilio: “Mi ta independiente. E último aña aki mi a biba riba mi mes na Kòrsou huntu ku mi ruman hòmber. Awor mi ta bai biba mas leu fo’i kas. Mi ta kere ku mi por.”
Mama Mirla ta sigur ku Cerilio lo logra na Estádos Unídos. El a lanta tur su yunan asina ku nan por logra tur kaminda. “Nos a eduká nos yunan independiente pa nan por ta fuerte pa dil ku tur kos den bida. Emoshonalmente su despedida ta duru pa nos. Pero mi ta kontentu p’e. Si bo ta trankil ora bo laga bo yu bai e ta bai enfrentá su karera ku un kurason sosegá. Cerilio ta un ehèmpel pa hóbennan riba e isla.”
Outor: Belkis Osepa