George Jamaloodin (man robes)
WILLEMSTAD – Awe meinta tempran a detené George Jamaloodin, minister di Finansa di gobièrnu Schotte, riba sospecho di ta envolukrá den e kaso Maximus.
Esaki a sosodé den un kas na Seru Loraweg kaminda Jamaloodin tabata keda temporariamente. A listra e kas aki, asina Guillano Schoop di Ministerio Públiko (OM) a konfirmá. A hasi búskeda den kas na otro lokashon tambe pero Schoop no ke komentá tokante di esaki.
E kaso Maximus ta trata di e investigashon di esnan ku a duna òrden pa asesiná e polítiko Helmin Wiels, ku nan a mata dia 5 di mei aña pasá. E kaso Maximus ta kore banda di e kaso Magnus, kaminda tin kuater hòmber detené bou di sospecho di a kometé e asesinato.
Carlos Monk
Siman pasá OM a indiká kaba ku a tende mas sospechoso den e kaso Maximus, despues ku èks minister Carlos Monk mes a papia i a indiká ku e ta ofishalmente sospechoso di ta envolukrá den e asesinato riba Wiels. E tempu ei OM no por a indiká ainda ken e otro sospechosonan ta.
Magnus
E trato riba kontenido di e kaso Magnus lo kuminsá 4 di ougùstus i lo dura un siman. Aki Elvis Kuwas (Monster), D’angelo Damascus, Nini Fonseca i Carlos Pieter lo parse dilanti wes riba sospecho di a ehekutá e asesinato. ‘Monster’ lo ta esun ku di bèrdarderamente a tira Wiels mata. E arma ku a hasi esaki kuné a haña bèk den Waaigat algun siman pasá.
Outor: Anneke Polak
E kas kaminda a detené Jamaloodin – potrèt: Anneke Polak