Lider di MFK Gerrit Schotte – potrèt: Anneke Polak
WILLEMSTAD – Parlamentario di MFK Gerrit Schotte no ta gusta e kosnan ku minister di Hustisia Nelson Navarro a papia na radio lokal. E minister a laga sa ku si e dal abou muri ta Schotte su falta.
“Navarro a deklará mi guera. Ayera nochi kaba el a laga sa na televishon ku e tabata sa kiko ta bai sosodé. Aparentemente na Hustisia tambe polítika ta hunga un papel”, segun Schotte. Navarro no ke reakshoná i solamente ta bisa ku ‘e ta hartá di Schotte su atakenan’.
Pániko
E miembro di Staten di MFK ta haña ku pronunsiashonnan asina no ta pas seka un minister ku ta abogado. “Mi no ta komprondé su papiá defensivo. Ta manera e ta den un pániko. E ta mustra ku e no ta kapabel, si aparentemente ta asina e mester defendé su mes.” Schotte ta bisa ku aktualmente niun hende na Kòrsou no ta sinti nan mes seif anto ku no ta Schotte mester pèrkurá pa seguridat, sino Navarro mes.
Listramentu di kas
Motibu pa e pleitu ta e detenshon di èks minister George Jamaloodin (MFK) di Finansa, ku a detené ayera meinta na un apartamentu na Seru Loraweg. Den e kas aki i tambe den dos kas na Steenrijk i Steenen Koraal a hasi listramentu di kas i a konfiská pertenensia. “Tabatin listramentu di kas den un hotèl den sentro tambe i na un negoshi nan Saliña”, OM ta bisa sin ke divulgá ta di kua hotèl i kua negoshi ta trata.
Será dos dia mas
Ayera tardi a detené Jamaloodin pa dos dia mas. Si OM ke detené e èks minister mas largu wes-komisario mester studia esaki awe.”Ku eksepshon di su abogado i reclassering, por lo pronto e no por tin kontakto ku niun hende”, asina OM a laga sa.
Schotte a bishitá Jamaloodin su mama, i teniendo kuenta ku e sirkunstanshanan e ta basta bon, e lider di MFK ta bisa. Di su èks minister e ta bisa: “Inosente te ora prueba kontrali. Mi ta spera ku nan tin nan kaso bon prepará. Tanten nos ta dieskuater luna mas leu despues di e asesinato riba Wiels.”
Outor: Anneke Polak