Minister Dowers na palabra – potrèt: BUVO
ORANJESTAD – E aspirante kònsel general venesolano pa Aruba Hugo Carvajal, despues di un estadia di tres dia den prizòn KIA a sali liber átrobe. Un avion privá a bin busk’é na aeropuerto di Aruba i entretantu el a yega Caracas kaba. Ei su famianan i e esposa di e presidente venesolano Maduro a yam’é bonbiní.
Den un komunikado di ministerio hulandes di Asuntunan Eksterior ku a lesa na Caracas tin pará ku e general tabatin imunidat diplomátiko a base di artíkulo 13 di e Tratado di Wenen tokante Asuntunan Konsular. Den e komunikado a rekonosé tambe ku e detenshon di e general na Aruba ta un infrakshon di palabrashonnan internashonal tokante imunidat diplomátiko.
Djárason último a detené Carvajal na Oranjestad na petishon di outoridatnan merikano ku ta sospech’é di trafikashon di droga. E ora ei e tabatin basta tempu ta keda riba e isla kaba.
Durante un rueda di prensa djadumingu atardi minister di hustisia arubano Artur Dowers i fiskal mayó Peter Blanken a laga sa ku minister di Asuntunan Eksterior hulandes Frans Timmermans awe a duna òrden pa laga Carvajal sali liber.
Fiskal mayó Blanken ta yama e desishon di minister Timmermans un ‘novum’. Mas trempan e atardi ei el a nenga redondamente e notisianan ku tabata keda bini di Venezuela ku Hulanda ta konsiderá Carvajal un diplomata akreditá i ku lo lag’é sali liber denter di algun ora.
Djis despues lo a yama Blanken na telefon ku e mensahe ku Carvajal ta kònsel si, pero ku alabes Hulanda ta deklar’é persona non grata ku lo no haña akseso na niun pais den reino. Minister Dowers ta bisa ku e no sa pakiko a deklará Carvajal persona non grata. “Esei ta un pregunta pa minister Timmermans.”
Na febrüari den kontesta riba preguntanan di parlamento Timmermans a atmití ku e ta na altura ku for di aña 2008 Carvajal ta riba e Specially Designated Nationals and Blocked Persons List di Treasury Department di Estádos Unídos. Ademas el a bisa ku no a drenta niun petishon di Venesuela pa aprobá un kònsel nobo. E minister a ripití esaki durante su bishita na Aruba na yüni. Pasobra no no a drenta niun petishon, no tabatin nodi di kontestá e pregunta si un hende manera Carvajal lo haña aprobashon, asina Timmermans a bisa.
Minister Dowers ta deklará ku outoridatnan merikano awor ta ‘masha desapuntá’ i ku lo papia ku nan riba e nivel di mas haltu pa perkurá ku e koperashon riba nivel di hustisia lo no sufri daño.
Outor: Ariën Rasmijn