Heerenveen (r) i Lippinkhof ta pidi masha despensa na Boneiru
KRALENDIJK – “Nos ta pidi Boneiru despensa pa e retrasonan di último tempu.” Direktor Edward Heerenveen a baha kabes durante e splikashon tokante e kousanan di e retrasonan na e periodistanan ku a bini huntu den e sala di reunion di Flamingo Airport.
Insel Air ta spera ku ku e orarionan nobo di buelo i e konekshonnan direkto entre Aruba i Boneiru e servisio lo mehorá.
Direktor Edward Heerenveen ta diskulpá pa retrasonan
Heerenveen i direktor komersial Jurgen Lippinkhof ta menta e kousanan pakiko e kompania di aviashon no por a duna e pasaheronan un bon servisio: pa motibu di fayo tékniko, problema finansiero pasobra a tene plaka na Venezuela, falta di avion pa remplasá i mantenshon frekuente di e avionnan, e retrasonan a akumulá.
Perhudiká
“Nos a tende hopi keho kaba. Pasaheronan tabata masha rabiá. Nan tin rason. Ta p ‘esei nos ta splika pakiko nos no por a solushoná e retrasonan”, segun Heerenveen. E ta bisa ku no ta Boneiru so a keda perhudiká. Aruba i otro destinashon di Insel Air tambe. Heerenveen ta haña sí ku e kompania aereo a hasi tur loke tabata posibel i alkansabel na e momento ei. “Nunka nos no a laga pasahero atras. Nos a transportá nan, asta te un or di mardugá.”
Pronto Insel Air ta haña dos avion Fokker 50 èkstra riba e ruta pa Boneiru. E ora ei tin un total di sinku avion ku ta bula entre e islanan. Semper lo tin un avion di reserva.
Aruba
Pronto Insel Air lo bini ku un orario di buelo nobo i ku buelo direkto entre Boneiru i Aruba, Jurgen Lippinkhof ta bisa. “Nos ta konsiente di e problemanan ku e konekshonnan for di Kòrsou pa otro destinashon. Awor strukturalmente nos lo bai bula direktamente pa Aruba.”
Outor: Belkis Osepa