Fiskal Henry Hambeukers i hefe di kuerpo di polis Hildegard Buitink | potrèt: Belkis Osepa
KRALENDIJK – Polis na Boneiru ta kuminsá un ofensivo kontra e ola eksplosivo di atrako riba e isla. Korps Politie Caribisch Nederland (KPCN, Kuerpo di Polis di Hulanda Karibense) lo bai traha represivamente pero tambe pro aktivo. Polis lo aserká posibel sospechoso aktivamente pa ‘kombersá’. E aña aki te aworaki a kometé 24 atrako. Hefe di kuerpo di polis Hildegard Buitink: “Nos no ta bai asepta esaki.”
Siman pasá na Boneiru tabatin shete atrako. Seis di nan riba restorant i supermerkado chines i unu tabata un robo riba kaya. Te awor polis a detené nuebe sospechoso.
Gezaghèber Edison Rijna i alto funshonario di polis Alwijn Braaf
Tim di atrako
KPCN, meskos ku aña pasa a konstruí un tim di atrako pa por hasi e búskedanan. Buitink ta bisa ku e kuerpo ta hasi esaki ku e kapasidat ku tin. Polis ta lucha ku un falta di personal. Buitink: “Huntu ku otro pais i ku Hulanda nos ta wak e táktika- i téknikanan èkstra ku nos ta usa.”
Ministerio Públiko (OM BES) ta usa palabra serio. Fiskal mayó Henry Hambeukers ta manda un aviso na tur atrakadó. “Tur hende mester sa ku si kometé robo ku violensia ku un arma lo pidi un kastigu di minimalmente 36 luna. Ke men djis asina bo por kai será tres aña.”
Opstákulo
Hambeukers ta haña ku polis ta hasi bon trabou si wak e kantidat di nuebe detenshon den un komunidat chikitu manera Boneiru. Ta invertí hopi den búskeda i persekushon di delito di violensia. Tòg Hambeukers ta bisa ku outoridatnan ta dal den opstákulo. “E investigashon pa despues hasi búskeda ta ken ta kometé e tiponan di atrako aki ta masha kompliká. E kriminalnan ta kometé e atrakonan ketu ketu, anónimamente i ku maskarada. Hopi be no por haña sa ta kiko nan a hòrta. Asta si nos haña kos hòrtá serka un sospechoso esaki no ta duna un kontestesta konkluyente si nan a kometé e echonan.”
Buitink ta apelá na komunidat bonerianu pa duna informashon i tep ku por indiká posibel sospechoso di atrako. “No por ta ku hende riba e isla no sa ta ken e atrakadonan ta. Ta hopi plaka nan ta kue. E hendenan den besindario ta mira otro hende ku ta saka hopi plaka.”
Outor: Belkis Osepa