E sangura Aedes Aegypti cu ta transmiti chikungunya y dengue.
ORANJESTAD — Na Departamento di Salubridad Publico (Despa) tin 55 aworaki melding di malesa chikungunya registra na Aruba. 15 di e casonan aki te aworaki ta casonan confirma, segun epidemiologo Eugene Maduro. 11 casonan aki ta importa for di mas tanto Republica Dominicanan y Haiti. Solamente dos caso a haya e malesa localmente.
“Nan ta bin cu simptomanan di artritis, dolor na joints, enkel, pols y pia, keintura y dolor di cabes, dolor di spier y lomba. E ora nan dokter di cas ta sospecha cu ta un caso di chikungunya anto e ora e hendenan aki ta wordo getest riba e virus”, asina e epidemiologo di Despa ta splica.
Scucha entrevista di Ariën Rasmijn cu Eugene Maduro
Motibo pakico casonan importa ta bin mas tanto for di Republica Dominicana ta pasobra eynan aworaki tin un outbreak grandi cu 250.000 caso registra di e malesa ta tumando luga. “Na Santo Domingo nan no ta test tur hende mas pasobra ya nan ta den un outbreak. E ora e hendenan aki ta bin Aruba anto bira malo, of bira malo eynan y bira bon kinan, test toch, y bo por saca afo cu nan a wordo infecta cu e virus di chikungunya”, segun Maduro.
Dengue
Pa loke ta casonan local, ta asina cu chikungunya ta wordo transmiti dor di e mesun sangura Aedes Aegypti cu ta transmiti dengue. Sangura aki ta activo henter aña, tambe den secura manera tabata e caso na Aruba den ultimo añanan. Maduro: “Sangura aki lo a pika un hende cu a bin di afo cu e virus anto despues pika hende cu no a viaha anto asina e virus ta transmiti.” Despues awacero semper tin un aumento di caso y departamento di epidemiologia di Despa ta anticipando un aumento di caso awo cu awa a cuminsa cay atrobe ultimamente.
Riba dje semper tin cu tene cuenta cu criadero di sangura. “Bo ta haya criadero den bo cas anto asina nan ta haya chens pa broei. Dus nos ta spera un aumento di casonan local di chikungunya”, asina Maduro ta indica. Toch no ta kere cu e cantidad di casonan lo ta asina alarmante manera na por ehempel Republica Dominicana y Haiti. Segun Maduro esaki tin di haber cu e maneho cu Gele Koorts Muskietenbestrijding (GKMB) tin pa cu fumigacion inmediato den cada bisindario unda ta haya sangura di dengue y chikungunya.
Autor: Ariën Rasmijn