WILLEMSTAD – Den e promé shete lunanan di 2014 a asesiná diesocho hende. Pa kuater di e kasonan aki a detené ocho sospechoso. Aña pasá e kantidat di víktima di asesinato di henter aña tabata 21.
Na 2013 e porsentahe di kaso ku a solushoná tabata 17.9 porshento. Si e kantidat di kaso ku no a solushoná na 2014 ta pa motibu di e retraso di 2013, segun bosero di polis Alfred Souarez ta un konklushon ku bo no por saka. “No ta kla si e kantidat di kaso ku no a solushoná e aña aki ta haltu òf abou. Ta te na kabamentu di aña ora nos mira e sifranan ofishal nos por bisa algu di esaki.”
Minister di Hustisia Nelson Navarro na mart di e aña aki a bisa ku e kantidat grandi di kaso no solushoná di 2013 tin di hasi ku e investigashon di e asesinato di Helmin Wiels. Esaki lo ta pidi e esfuerso máksimo di e tim di investigashon. Souarez no ta konfirmá esaki: “Mi no sa di unda Navarro ta saka e sifranan aki, pasobra ami no tin niun idea.” Souarez tin tiki kontakto ku e timnan di investigashon mes, pero ku nan lider di tim si. Nan lo mester ten’é na altura si tin problema. “Skarsedat di personal òf material mester raportá na mi i mi no a tende nada.”
E siguiente eventonan aki a pidi diesocho bida e aña aki:
21 di yanüari: ta haña e kurpa sin bida di Erwin Christino Alberto (56), sospechoso di violensia doméstiko, na sabana di Hato. Su morto ta bou di investigashon.
29 di yanüari: ta asesiná Rouell Randolf Grego Martina (24) den un likidashon violente na un snèk na Jan Doret. Ainda e tiroteo ta bou di investigashon.
3 di mart: ta haña e kurpanan karbonisá di Oscar Neira Muño (33) i Siegfried Miguel Benito (60) na Baya Beach. Polis ta sospechá ku e kaso aki ta konektá na un ripdeal i ta investigá e kasomas aleu.
5 di mart: Guillermo Odlanier Joseph Borrebach ta víktima di un balaso riba un tereno di parker na Saliña. Pa e asesinato aki riba 18 di mart ta detené dos hòmber i ta hiba nan dilanti wes.
10 di mart: Ta haña Shannon Girigorie Borgschot (46), un chòler den Koraal Specht, morto. A batié mata ku piedra. Riba 18 di mart ta detené kuater hóben. Riba 25 di yüli ta sentensiá nan pa kastigu den sèl i detenshon hubenil.
17 di mart: Ta asesiná e parehá hóben Nikita Catharina Attaf (23) i Shendrick Emanuel Randt (17) i ta tira nan kurpanan pegá ku Bullenbaai. Ta haña e kurpanan sin bida manisé. Polis ta suponé ku e kaso aki ta liá na un ripdeal i ta konektá ku e asesinato na Baya Beach. Ainda ta investigá e kaso.
17 di mart: Hòmber na maskarada ta tira Renzo Soleana den su kas den Schonegevelstraat i den anochi e ta fayesé di su heridanan. Polis ta suponé ku e kaso aki ta liá na un ripdeal i ta konektá na e asesinato na Baya Beach i e asesinato riba e hóbennan. Ainda ta investigá e kaso.
20 di mart: Ta hinka Nicholas Calus Powell mata na Noord Zapateer. Dia 9 di aprel e sospechoso ta entregá su mes pa e asesinato. Ta un guera ku a sali fo’i man ta kousa di e hinkamentu.
14 di mei: Den un tiroteo na Kaya Otto Senior un drogadikto ta fayesé. Ta haña e hòmber den un kas inabitá ku un tiru den lomba. Identidat di e hòmber ta anónimo. E motibu di e tiramentu no ta konosí i ta bou di investigashon.
17 di mei: Giomalon Vladimir Betrian (18) ta pèrdè su bida den un tiroteo na un kaminda di tera di Kaya Epidendrum. Polis ta haña hùls di bala pero un motibu no ta konosí. E kaso ta bou di investigashon ainda.
28 di mei: Ta tira Sherwin Francisco Makaya (52) mata serka di un kas na Fortuna Ariba. No tin klaridat kiko ta e motibu. Ainda ta investigá e kaso.
6 di yüni: Intenshonalmente ta trapa Francisca Josefa (51) ku outo den Kaya Duvert ‘Boy’ Nicolina i e ta fayesé despues den Sehos. Ta detené un sospechoso relashoná ku e asesinato, e investigashon ta kore ainda.
8 di yüni: Ora e yega kas ta tira Rayshell Gregory Manuel (40) mata banda di su outo. E motibo pa e asesinato no ta konosí. Ta investigá e kaso ainda.
3 di yüli: Un drive-by-shooting na Weto ta kosta bida di Eddy Rosario Rodriguez (29). E víktima tabata sintá den su balkon ora ku un outo a pasa i a tira riba dje diferente be. Ta investigá e kaso ainda.
10 di yüli: Un kolega ta tira e milisiano Ishtarr Nicasia di 22 aña di edat pa motibu di un guera tokante e wega di bala Hulanda-Argentina. Dia 30 di yüli e víktima ta fayesé na su heridanan A arestá su kolega.
15 di yüli: Ta asesiná Shantley Percival Arnhem (23) i Jais Juliana durante un tiroteo na aeropuerto Hato. Tur dos ta konosí serka polis i ta asumí ku ta un likidashon den e sirkuito kriminal. Ainda e investigashon ta kore.
Outor: Elisa Koek