Shareska Coffie na krèsh Bon Kwido | Foto Belkis Osepa
KRALENDIJK – Shareska Coffie (21) ta un dje studiantenan Boneriano ku a sali dia 3 di ougùstùs pa Hulanda pa kontinuá su estudio. E ta sigui traha riba su futuro i logra su diploma komo trahadó soshal pa pa manera e mes ta bisa, bira un hende muhé adulto independiente. E tin un mensahe pa studiantenan nobo: ‘No deskurashá lihé”.
Nuebe studiante di Boneiru a biaha bou di guia pa Hulanda pa kontinuá ku nan studio. Tambe for di Saba (2) i Statia a sali bekado riba un otro buelo via Sint Maarten rumbo pa Hulanda. Na total 43 bekado di Hulanda Karibense ta bai Hulanda pa sigui studia. Pero solamente 16 studiante a skohe pa guia di e instansha Sint Maarten Support Services (S4). Sobra mes ta regla tur kos pa nan estadia i estudio na Hulanda.
Belkis Osepa den kombersashon ku Shareska Coffie
Oportunidat
Shareska Coffie ta preparando sigur 4 aña kaba pa e sigui su studio di trahadó soshal riba nivel di hbo. E ta bai hasi esaki na Hoge School Arnhem/Nijmegen. Anteriormente e tabatin intenshon di hasi mbo na Hulanda, pero el a kaba e diferente nivel di mbo na Boneiru i awor sí e ta kla pa bai Hulanda. “Mi a skohe pa Hulanda pasobra mi ke engrandesé mi mes komo persona i studiante. Na Hulanda mi tin mas oportunidat.”
Meskos ku tur otro studiante, Shareska Coffie a prepará su mes pa su biahe. Anke e ta bai HUlanda pa promé bia, e ta kla pa biba independiente. “Mi a prepará mi mes mentalmente. Pa loke ta trata e wer, pa esei si bo no por prepará bo mes. Ora mi yega mi ta wak kon e ta. Mi ta ansioso.” Si e ta kere ku lo no ta fásil na Hulnada, sigur no e promé tempu na e pais. “E lugá ta nobo, lo mi topa hende nobo, esfera nobo i skol nobo. Pero mi no ta un hende ku ta deskurashá lihé. Mi ta lucha pa loke mi ke.”
Eksperensha
Shareska Coffie tin un bunita eksperensha pa kuminsá su studio kuné. Pa sigur kuater aña e ta traha partaim na krèsh Bon Kwido na Boneiru. “E trabou a yudami haña eksperensha kon pa anda ku otro hende i mucha. Ta parti di e studio ku mi ta bai hasi. Mi a siña atendé ku hende di diferente karakter i problema. Mas eksperensha bo tin komo studiante, mas mihó pa bo mes. E ta yudami den mi estudio.”
Tin mas studiante di Hulanda Karibense ku a haña finansiamentu di studio hulandes, pero ku no ta bai studia na Hulanda. Diestres studiante ta bai Merka pa sigui studia. Dies a skohe pa Kòrsou i Aruba lo risibí un studiante di islanan BES. E departamentu di finansiamentu di studio di e servisio di Reino di Hulanda Karibense (RCN) a registrá 21 fiansa di studio na Boneiru mes.
Outor Belkis Osepa