Abogado Marije Vaders – potrèt di archivo: Dick Drayer
WILLEMSTAD – “Mi tin diesun luna será kaba pa un kaso ku a kousa un shòk total den nos komunidat. Mi ta di akuerdo. Pero mi famia i ami tambe ta den shòk, pa motibu ku mi ta será. Mi no tin nada di hasi ku e bagamunderia aki.”
Esaki ta e deklarashon di Burney ‘Nini’ Fonseca, ku ta sospechoso di ta e konekshon entre e perpetradónan intelektual tras di e asesinato riba polítiko Helmin Wiels i esnan ku a kometé e asesinato. Fiskal Gert Rip riba e di kuater dia di e tratamento di kontenido ta indiká ku e ke posponé e kaso aki. E motibu: e kuchu ta kòrta ku dos banda. Den e kaso Maximus, ku ta investigá e perpetradónan intelektual, tambe Fonseca ta hunga un papel segun Rip.
Dick Drayer ta papia ku dos espektador pafó di korte
Apsolushon
Marije Vaders ke finalisá e kaso mas lihé posibel, ya por laga su kliente sali liber pa e bai bèk serka su kasá i su tres yunan. “E investigashon ta dura diessinku luna kaba. OM no a logra haña niun prueba kontra mi kliente. Desesperadamente OM a detené dos sospechoso, e asina yamá dunadónan di e enkargo. Un hungá stratégiko di OM, pero tur hende ku tin un krenchi konosementu di lei, a base di e fail aki mester yega na apsolushon.”
Ku e dos sospechosnan ku a detené Vaders ke men doño di loteria Robbie dos Santos i su ruman, èks minister di Finansa George Jamaloodin. Entretantu tur dos ta liber atrobe, pero nan ta konta komo sospechoso ainda den e kaso Maximus. Fonseca ta bisa wes: “E mésun insinuashonnan ku tin kontra mi tin kontra nan tambe. Nan si a sali despues di algun dia pero ami si tin diesun luna será kaba den un kaso ku mi no tin nada di hasi kuné. Ami no tin famia? Hustisia no ta pa tur hende?”
Kontakto via sms
Rip no por aseptá ku Fonseca, di kende niun famia no a bini e seshon, lo ta inosente. Pasobra e ke posponé e kaso e ta limitá su mes na tresementu dilanti di e obligashon pa proba. E fiskal ta indiká sí ku aña pasá for di yanüari te ku dia 4 di mei 18.54 or tabatin kontakto via sms regularmente entre Fonseca i Jamaloodin. “Fonseca ta sms Jamaloodin: ‘Ruman, mi tin mi ünifòrm, unda mi por mira bo pa mi por bai traha?’ pa kaba Jamaloodin riba 4 di mei kontesta: ‘ki ora bo por pasa pa mi por bisa bo?’ Nan ta palabrá di topa na kas di Jamaloodin. E kontakto di sms ta para abruptamente despues di e asesinato riba Wiels.
Konsultá medio
Vaders ta indiká lo a aserká un medio ku a pone ku a arestá Jamaloodin. Entretantu e ta liber atrobe pasobra no tabatin sufisiente opheshon serio kontra dje. “Mas loko ku esaki no tin, ta skandaloso ku OM ta tribi di hinka e tiponan di deklarashon aki den e fail. Dankidjos e wes komisarionan no a laga e kos aki nèk nan. No a sali nada komprometedor kontra mi kliente. No tin niun motibu pa wanta e kaso mas largu. E ta retrasá sin tin nodi kaba i OM ta trata di hasi esaki atrobe.”
Mañan, riba e último dia di e trato riba kontenido di e kaso Magnus, wes lo tuma un desishon si lo keda mantené trato di e kaso di Fonseca òf nò.
Outor: Anneke Polak