Supermerkado chines ku a atraká fin di yüli – potrèt: Belkis Osepa
KRALENDIJK – Komunidat chines na Boneiru ke pa para e ola di kriminalidat riba e isla. Segun empresario Thing Chung Yan mas doño di supermerkado i restorant chines ta haña ku no ta hasi hopi pa kombatí atrako armá. “Nan tin miedu i nan no ta ta sinti nan mes seif.”
Thing Chung Yan ta bini di un famia di empresario i e mes ta traha den konstrukshon. E sa ku den e komunidat chines ta papia hopi tokante e ola di kriminalidat. Espesialmente supermerkado, toko i restorant ta víktima di atrako armá. Hopi di nan ta den man di doño chines.
Belkis Osepa ta papia ku Thing Chung Yan
Seguridat
Korps Politie Caribisch Nederland (KPCN) ta bai duna empresario informashon tokante mihó seguridat. Hefe di reshèrshi Alwyn Braaf: “Nos ta pidi empresario i kliente pa ta alerto. Doñonan di supermerkado i restorant mester pèrkurá pa nan kompania tin bon lus i nos ta rekomendá pa pone kámara. Ounke e atrakadónan ta bisti maskarada esaki por yuda nos.”
Segun Chun Yan e empresarionan ta tuma medidanan preventivo. Hopi di nan ta pone kámara di seguridat, otro nò. “Kisas nan ta wak e gastunan, otro no sa ta ken por instalá esaki pa nan. Un kos kasi tur sa: lat òf trempan nan bùrt por yega.”
Sèn di troka
Un hòmber chines tras di bar na Peking Restautrant na Kaya Korona no ke bisa mashá tokante e atrakonan riba e isla. Algun siman pasá e restorant tambe a bira víktima di un atrako. “Si nan a kue hopi? Nò, shen dòler so. Nos ta ta tene nèt sufisiente plaka den kaha pa nos tin sèn di troka. Nan ta bini pa e plaka. Nos ta duna nan loke tin anto nan ta bai atrobe.”
E restorant tin kámara kaba. “Asta den kushina nos tin kámara”, e chines tras di bar ta bisa. “Paden i rònt di henter e edifisio (e restorant i e supermerkado Wing Cheung red.) tin diesseis kámara. E atrakadónan ta bini ku maskarada bistí. E ora ei e imágennan no ta yuda mashá.”
Sintimentu
Segun Chung Yan ta eksistí e idea ku chines ta kai víktima mas tantu ku otro hende. “Nan no ta mira solushon konkreto di polis. Nan tin miedu. Despues di un atrako e empresarionan sa ku un par di luna despues nan lo kai víktima átrobe. E sintimentu ei no ta agradabel.”
E chinesnan ta papia ku otro tokante kriminalidat i nan ta pensa ku ta hóben ku no ke traha ta kometé e atrakonan, Chung Yan ta bisa. “Henter dia nan ta kore bai bini den outo, nan tin selular i kèts karu. Nan ke haña plaka na un manera fásil. Asta si nan bai será un temporada nos mester tene kuenta ku ta surgi grupo nobo di atrakadó. No ta algu ku nos ta skapa di dje shen porshento.”
Daño
Presidente Frits van Ham di Asosiashon di Importadó i Supermerkado bonerianu (VBIS) ta bisa ku tin basta hopi miedu serka e trahadónan di supermerkado i restorant. “Nan tur ta drei wak patras tres be i ta keda vigilá hende.” Den kaso di atake armá no mester wak solamente e daño material sino tambe e daño emoshonal i síkiko. “E damanan ta masha spantá mes. Den sierto supermerkado nan ta sinta ku lomba pa porta.”
Outor: Belkis Osepa