Pasahero ta warda informashon mientras ku nan buelo ta hopi retrasá – potrèt: Belkis Osepa
KRALENDIJK – Un voucher di diessinku florin no por kita e iritashon, e falta di pasenshi i desapuntashon ku e retraso di buelo 7I 309 ta kousa. Kada be atrobe e pasaheronan ta tende un ora di salida nobo. Klaramente nan tin falta di informashon. Gezaghebber Edison Rijna: “Nan ta tuma nos hasi kèns. Esaki no ta manera pa trata pasahero.”
Buelo 7I 309 mester a sali dies pa tres. Algun pasahero pa e buelo ei tabata na kareda pa nan alkansá e buelo despues ku nan a para warda den e rei di check in sigur un ora largu.
Voucher
E multitut di hende na gate 3 ta birando mas i mas grandi mientras ku e ora di salida ta pasa. Iritashon ta subi i e pasenshi di e pasaheronan ta kaba kompletamente. Kontínuamente e ora di salida di buelo 7I 309 ta kambia. E trahadónan di Insel Air ta trata di informá e pasaheronan mas mihó posibel i ta pidi despensa. Ma tòg nan no por duna e pasaheronan un kontesta kla ta kiko ta pasando. A lo largu ta parti voucher di 15 florin pa persona. Ora di salida awor a bira kuartu pa sinku.
Voucher
E pareha Peters (70) i Evarista Winklaar (75) ta trata di kome e krokèt i bebe e limonada ku nan a buska ku e voucher di 15 florin pa persona. Ta opvio ku Peters ta pasa hopi trabou pa guli e kuminda. Ku un kara di trèk di doló e ta sinta warda.
Sita di dòkter
Peters su brasa robes ta mitar den ferbant i di spalk. Evarista Winklaar ta papia pa su kasá. “El a kaba di operá garganta. Durante nos estadia aki na Kòrsou el a kai kibra su brasa. Nos mester bai dòkter na Boneiru mas lihé posibel, pero awor nos ta yega lat.”
Despues ku el a kaba di guli Peters Winklaar por papia: “For di diesun or nos ta na Hato. Kada be mi yunan na Hulanda ta yama na telefon. Mi no ta alkansá e sita ku dòkter mas.”
Inaseptabel
E kos aki no ta hustu, Sixto Boelbaai ta haña. E ta biba na Hulanda i ta bai bishitá famia na Boneiru. “Mester trata nos mas mihó. E plaka no ta yega mes pa kumpra un bon kuminda.” Ronald Asedoeba tambe ta haña e kos inaseptabel. Insel Air a yam’é na telefon pa bis’é ku su buelo ta sali mas trempan. “Si nan no por hèndel nan asuntunan nan mester bai koperá ku otro kompania òf gobièrnu mester tuma e kompania ofer. Nos tur por aseptá un retraso. Ma nò di kuater ora si.”
E krítika di e pasaheronan no ta toka asina tantu e retrasonan. Nan ta malkontentu ku e dunamentu di informashon. Michael Parkinson ta biaha pa Hulanda via Boneiru. “Tin retraso rònt mundu. Pero si bo tin retraso bo mester informá hende si. E promé mei ora nan tabata kore rònt manera vruminga loko. Nan ta hopi poko poko pa duna e pasahero informashon. Asina bo ta krea bruamentu pòrnada.”
Fin di yuli Insel Air a pidi Boneiru masha despensa. Direktor Edward Heerenveen personalmente a bai e isla pa bai splika un ke otro. Insel Air a bisa di ta spera ku e orario nobo lo drecha e servisio.
Primintí mihó
Gezaghebber Rijna tambe tabata un di e pasaheronan ku tabata warda. E ta konta kon e ta kòrda bon ku maneho di Insel Air a primintí bestuurscollege mihó. Rijna: “Lástimamente ainda no t’asina.” Diferente pasahero ta papia ku Rijna mientras ku e ta mira turista ta kana rònt demoralisá ta warda e avion su salida. “Mi ta bai aserká Insel Air i pidi nan tuma Boneiru mas na serio. Naturalmente nan no a planea e kos asina, pero lástimamente esaki ta masha marga. Mi no por laga e kos aki pasa numa.”
Entretantu e ora di salida a kambia pa seis or. Ora Evarista Winklaar a tende esaki el a basha na yoramentu. E no por a para mas riba su pianan. A manda buska dos ròlstul, unu p’e i e otro pa su kasá. E MD 80 a sali 18.20 or di Hato pa Flamingo International Airport.
Outor: Belkis Osepa