Wolfgang Tooten – potrèt : Hazel Durand
THE BOTTOM – E último lunanan diferente hotèl na Saba mester a sera nan portanan pa motibu ku ekonomia ta bai atras i e impuesto haltu di propiedat inmóbil ku a introdusí for di 10 di òktober di 2010. Doñonan di hotèlnan ku ainda ta habrí ta teme ku nan tambe tin ku sera si e dispensashon temporario di impuesto kaduká.
“Mi no sa kon mi mester mantené mi restorant i hotèl habrí. Tin be mi ta gana ménos ku mi tin ku paga. E ora ei mi mester fia òf paga den término, pero mi no ta wanta esaki muchu largu”, Wolfgang Tooten ta bisa. E ta manager di hotel na Scouts Place, un di e hotèlnan di mas bieu di Saba. Ounke ya a sobra ménos hotèl ainda okupashon ta keda abou. “A bira karu pa bishitá Saba i turistanan no ta bini.”
E èks sekretario di estado hulandes di Finansa Frans Weekers a introdusí dispensashonnan temporario na 2011, loke a baha e impuesto riba propiedat inmóbil i sierto komestibel tabata liber di e impuesto di importashon di seis porshento.
‘No tin merkado laboral’
A prolongá e dispensashonnan temporario aki na kabamentu di 2012 ku dos aña. Fin di e aña aki esaki a kaba i e pagadonan di impuesto mester paga henter e suma. “No por ta na benefisio di Tweede Kamer ku serka nos ekonomia ta bai atras i ku mas hende lo pèrdè trabou”, Tooten ta agregá. “No tin merkado laboral”, e ta bisa.
Awor Saba Business Association (SBA) ta urgi pa prolongá e dispensashonnan pa dos aña mas. Pasobra ekonomia di Saba a kai den difikultat i mas empresa ta sera òf ekonomisá, pronto SBA ke organisá un konferensha kumbre ekonómiko.
Prima sosial
Segun Tooten ta un problema grandi tambe ku doñonan di trabou mester paga prima sosial. “Empresario chikí kada tres luna mester paga 18.4 porshento na prima sosial, asta ora kos ta malu.” Esei ta e kaso aworaki. Sabanonan mes no por paga e restorantnan i atrakshonnan pasobra e preisnan ta adaptá na turista i esakinan ta keda sin bini pasobra Saba a bira karu pa motibu di impuesto i prima. “E preisnan di konsumidó ta subi”, Tooten ta bisa. “Miéntras ku nos ke ofresé preis honesto pa atraé mas kliente.”
SBA ta planeá e konferensha kumbre ekonómiko pa ora ku e sekretario di estado aktual Eric Wiebes bishitá e isla, pa asina e por topa e partidonan ku a sufri daño i por tende nan eksperienshanan i prekupashonnan. SBA a ekspresá nan kehonan den un karta kaba i lo manda e karta aki Tweede Kamer tambe. “Komèrsio ta sinti ku ta manera e polítikonan hulandes no ta duna atenshon na Saba”, Tooten ta bisa.
Outor: Hazel Durand