E nabegantenan di Ukraina i un supervisor ta yega korte – potrèt: The Daily Herald/Althea Merkman
ORANJESTAD – Korte Komun di Hustisia awe a mantené e petishon pa asilo di dos nabegante di Ost Ukraina ku a keda pegá na Sint Eustatius.
E dos refugiadonan di Ukraina a yega Statia ora ku riba 22 di mei e kapitan di un yate di bela a laga nan atras riba e isla. E dos tripulantenan a keda un anochi na playa, i su manisé nan a mèldu na warda di polis.
Wes a mantené e petishon pasobra gobièrnu hulandes no a tuma un desishon ainda si persona ku nashonalidat ukraino por haña asilo polítiko na Hulanda.
Guera sivil
Nan a pasa dos luna riba laman sin kontakto ku sobrá di mundu i asina no tabatin niun idea ku nan patria a hañ’é envolví den un guera sivil. Ora nan a haña sa esaki e dos habitantenan di Donetsk a disidí di pidi e státùs di refugiado a base di konvenshon di Ginebra. E konvenshon aki ta regla akohida humanitario pa siudadano, prizonero di guera i militar den situashon di guera.
For di dia di nan yegada riba e isla e hòmbernan ta haña akohida den forma di rashon di kuminda ku gobièrnu lokal ta duna nan. Tambe nan ta risibí ayudo di algun habitante individual di e isla ku a kai nan nan pena.
“Nos ta masha gradisido pa e sosten di pueblo di Statia, kaminda nos ta trata di establesé un bida nobo.”, e ukrainonan a laga sa. “E último dos lunanan di insiguridat no tabata fásil, ma nos tin speransa ku pronto nos por pone nos bida kana atrobe despues di un temporada difísil.”
Outor John van Kerkhof