Minister di Hustisia Dennis Richardson den su ofisina dilanti di un pintura di un di su artistanan lokal favorito – Ras Mosera – potrèt: Today/Hilbert Haar
PHILIPSBURG – Minister di Hustisia Dennis Richardson ayera a konvoká gobièrnunan di Aruba i Kòrsou pa djòin e resistensha di Sint Maarten kontra loke el a yama “desishon di Rijksministerraad ku ta kontra lei.”
Richardson ta bisa ku gobièrnu ta kasi kompletamentu di akuerdo ku e rekomendashonnan den e rapòrt di integrashon di komishon Wit, pero ku den e rapòrt e abusu di poder di Rijksministerraad no a haña e atenshon ku e meresé.
Kuater investigashon
“A kousa e impreshon ku Sint Maarten lo ta kontra investigashon di integridat pero awor nos por dera e noshon ei. Nos tin kuater investigashon di integridat: di Algemene Rekenkamer, di Transparency International, di Komishon Wit i e investigashon ku a dediká na gobernador.”
Frontera
Richardson ta bisa ku awor si gobièrnu ta sera un frontera den relashonnan ku Rijksministerraad. “Ku tur posibel medio hurídiko nos lo resistí desishonnan ku ta kontra di lei.”
Ademas Richardson a apelá na e gobernadornan di e paisnan den reino pa no ehekutá desishonnan asina di Rijksministerraad mas. “Mientras tantu ku gobièrnu hulandes no koperá ku lantamentu di un instituto independiente pa resolvé konflikto entre e paisnan, nos lo resistí di e manera aki.”
Resolushon
E opinion aki ta kuadra ku e resolushon ku e presidentenan di e parlamentonan i nan komishonnan pa Asuntunan Interior i Relashonnan den Reino a aseptá djamars. Eiden tur tres pais ta boga pa lanta e instituto ku Richardson ta referí na dje.
Outor: Hilbert Haar