Rignald Recordino ‘Doble R’
WILLEMSTAD – Rignald Recordino, ta kla pa eksperenshá pa di dos bia e rekonosimentu ku e ta haña komo un berdadero maestro musikal, ora ku Metropole Orkest di Hulanda, presentá na Kòrsou. Algun aña pasá, Metropole Orkest a duna dos konsierto na honor di Rignald Recordino.
E konsiertonan a tuma luga na Concertgebouw na Amsterdam i de Doelen na Rotterdam. Vários kantante a presentá den e konsierto i kanta piesanan di Doble R, entre otro Karin Bloemen, Giovanca i Gibi Doran.
Dulce Koopman a papia ku Rignald Recordino riba e evento grandi aki
Metropole Orkest kompleto
Na Kòrsou e rekonosimentu pa Rignald Recordino ta bira posibel dor ku e organisashon di Curaçao North Sea Jazz Festival ta trese Metropole Orkest kompleto na Kòrsou pa duna tributo na Doble R. Gregory Elias ta ofresé públiko di Korsou e konsierto aki grátis. E interes pa e konsierto aki ta hopi grandi i tur e 10 mil karchinan ku Fundashon Bon Intenshon a parti gratis Aña di La Reina, a kaba den algun ora.
Pa ofrese tòg oportunidat na e grupo grandi ku no a hana karchi pa WTC, tin posibilidat pa wak e konsierto riba pantaya grandi riba Brionplein, na momentu ku e konsierto ta tuma luga na WTC. Doble R ta hopi agradesido na Gregory Elias pa trese e Orkesta grandi i renombra aki Korsou, pa realisá e tributo i ku komunidat di Kòrsou tambe por biba e momentu aki kuné.
600 komposishon
Doble R tin mas ku 600 komposishon riba su nòmber i el a konkistá un lugá prominente den e historia musikal na Korsou. Rignald Recordino ta e úniko persona na Kòrsou ku tin asina tantu komposishon riba su nòmber. Segun Rignald Recordino su prestashon musikal el a hasié pa e pueblo di Korsou. Ta pesei e ta hopi satisfecho ku Fundashon Bon Intenshon ta duna pueblo e oportunidat pa biba e tributo aki. “E tributo ta koronashon di mi trabou”, Recordino a bisa.
Outor Dulce Koopman