WILLEMSTAD – Den e registro BIG na Hulanda tur hende por wak si nan médiko ta kumpli ku e eksigenshanan pa hasi su trabou. Na Kòrsou tambe a tuma e lei BIG (Wet op de beroepen in de individuele gezondheidszorg, Lei di trabou den kuido médiko individual, trad.) pero te ainda no ta ehekutá e lei. Asina médikonan ku tin solamente nan edukashon básiko tòg por traha komo dòkter di kas òf speshalista.
“Na desèmber 2009 a tuma e lei BIG bou di mi mando”, èks minister di Salubridat Omayra Leeflang ta konta. “E registro ta e parti di mas importante di e ehekushon i por a traha esaki te dia ku Kòrsou bira un pais. Esaki no a sosodé despues di 10-10-10.”
Na Hulanda na 1993 e lei BIG a remplasá e Wet Uitoefening Geneeskunst i e ta pèrkurá pa protekshon di título. Médiko ku ta registrá den BIG por yama nan mes dòkter di kas òf siruhano. I médiko ku no ta registrá nò.
“E lei bieu tabata konosé solamente e edukashon di Medisina sin speshalismo”, inspektor general suplente na inspekshon di salubridat Joe Alcalá ta konta. “Lei BIG si konosé speshalismo i ta bai mas leu ku rekonosé so. BIG ta lia eksigensia di kalidat na un médiko i ta kontrolá e eksigenshanan aki kada sinku aña. Si un médiko no kumpli ku esaki e ta pèrdè su registrashon BIG.” E eksigenshanan ta enserá ku e médiko mester tin e spesialismo adekuá, ku e mester ta aktivo den su trabou i ku e mester sigui training adishonal.
Sin studia na Hulanda
Na 2011 Dean Rozier (e tempu ei lider di frakshon di MFK) a aserká Tweede Kamer ku e petishon pa hasi e kos mas fásil pa studiante di Kòrsou ku no ta studia na Hulanda pa haña un registrashon BIG. Hulanda a indiká ku e státùs di Kòrsou no ta konektá outomátikamente na un prosedura mas simplifiká kompará ku otro pais pafó di reino. Pa médiko kurasoleño ku por ehèmpel a studia medesina na Suramérika, esaki ke men ku por lo pronto nan mester bai Hulanda pa registrá aya.
Propio inisiativa
Pa duna dòkter di kas ku no a hasi nan estudio na Hulanda opshon, e Asosiashon di Dòkter di Kas a lanta e Commissie Accreditatie Nascholing (CAN, Komishon Akreditashon Edukashon Adishonal, trad.) Via CAN ta ofresé kurso i den koperashon ku SVB ta chèk si dòkter di kas ta sigui e kursonan aki. “Un dòkter di kas ku ke kuminsá un práktika òf tuma un práktika ofer ta obligá di kumpli ku e eksigenshanan di edukashon adishonal di 40 ora pa aña”, dòkter di kas Walid Elhage ta bisa.
E dokter di kas mester entregá e eksigenshanan aki na SVB i entregá nan kada aña di nobo. E dòkter di kas ta haña un aña pa alkansá su oranan. “For di tres aña ta anotá esaki estriktamente i mas i mas dòkter di kas ta djòin. 95 porshento di e dòkternan di kas na Kòrsou awor ta sigui edukashon adishonal. Asina nos por garantisá kalidat ainda. E struktura t’ei, ta e registro ta falta”, Elhage ta bisa.
Registrashon BIG riba mesa
Segun Alcalá den Ministerio di Salubridat ta traha si na e ehekushon di e registro BIG. “For di kuminsamentu di 2013 mi ta trata na fòrsa instalashon di e registro i regularmente nos ta kombersá ku minister. Pronto lo ta posibel pa buska un dòkter di kas òf un speshalista den un registro. Dia esaki eksistí di bèrdat, inspekshon lo rekonosé e médikonan, disidí si nan ta haña nan registrashon i vigilá garantia di kalidat.
Outor: Elisa Koek