Edison Rijna tussen de aankomende Rijksvertegenwoordiger Isabella en wnd Julian Woodley
Kralendijk – Edison Rijna a tende di tur banda den e sala di reunion di konseho insular ku komo Boneriano outéntiko e speransa ta grandi ku e ta bai hasi un bon trabou komo gezaghèber di Boneiru. Dilanti representante di Reino suplente Julian Woodley el a huramentá djabièrnè atardi den Pasangrahan.
Vários miembro di konseho insular a ripití den nan diskurso na okashon di e huramentashon di Rijna ku e funshon di gezaghèber no ta fásil. Ta un reto grandi, pero e speransa ta grandi ku Rijna lo sinta e seis aña stipulá komo gezaghèber.
Belkis Osepa den entrevista ku gezaghèber Edison Rijna
Shen porshentu Boneriano
Miembro di Konseho Insular Rafael Santana a duna rijna un ehèmpel di su mes komo yu di un imigrante. “Si ami tabata por, nos sa ku abo tambe por. Abo konosé nos rais I kultura.” Benito Dirksz di e frakshon di oposishon MBL tambe a mustra riba e oríhen di Rijna. “Nos ta haña un gezaghèber shen porshentu Boneriano. E pueblo di Boneiru ta sklama pa haña liderato na nivel. E pueblo tin nesesidat pa haña hende represent’é dignamente.”
Robby Beukenboom a enfatisá riba e posishon ku Rijna mester asumí na bienestar di Boneiru. “E gezaghèbernan di turno a haña nan den e posishon kun an mester Sali na interes di Boneiru òf tene kuenta ku e interes di Hulanda. Nos mester di un gezaghèber ku ta par ashen porshentu na interes di Boneiru. Si esei no ta e kaso lo e tin un problema ku frakshon di Demokrat.”
Interes di pueblo
Rijna a skucha e diferente diskursonan ku atenshon i a duna di konosé ku komo mucha di Playa Pariba e tin Boneiru na pechu. E ta realisá ku e tin un responsabilidat grandi. “Lo mi dediká mi mes kompletu pa sirbi interes di pueblo. Komo Boneriano outéntiko mi ta sali na vanguardia di nos isla.”
Rijna ta kla pa fungi komo tata di pueblo fi Boneiru. E ke pa despues di su seis aña di mandato mira un mihó Boneiru. Ya Rijna a sinta seis luna komo gezaghèber suplente. Durante un entrevista Rijna a bisa ku den su funshon e mester buska balansa. “Ta un liña masha fini. Tin bes bo mester baila i bira pa haña e balansa.”
Riba polítika
Gezaghèbernan den pasado a haña nan mes den diferente polémika relashoná ku polítika. Rijna ta bisa di ta konsiente ku e mester di polítika pa atendé sierto tópikonan, manera enbolbimentu di hubentut I kaba ku pobresa. Rijna ke pa na Boneiru stòp ku polítika tradishonal. “E no ta di e tempu aki mas. Ami ta riba polítika i ta trata tur partido hustu segun mi konsenshi.”
Outor Belkis Osepa