Taksistanan ta haña ku mester di mas seguridat na aeropuerto | Potrèt: José Manuel Dias
WILLEMSTAD – Mientras ku taksistanan, empleadonan, pasaheronan i bewakernan ta haña ku mester di mas seguridat, Curaçao Airport Partners (CAP) ta keda para ariba ku tin sufisiente seguridat na aeropuerto. Esaki apesar di e kaso di tiroteo masal ku a tuma lugá luna pasá riba tereno di aeropuerto.
Segun vise presidente di ABVO, Kenneth Bremer, un di e problemanan kardinal ku ta afektá e nivel di seguridat na aeropuerto ta e falta di personal ku tin aktualmente i e echo ku CAP no ta koperando pa bini ku un solushon. Ta bini aserka ku e sistema di kámara di vigilansia no ta funshonando manera mester ta. “Tin kaminda ku a kita kámara anto tin hopi kámara ku ta dañá. Pa kolmo e poko kámaranan ku ta funshonando no tin sufisiente personal na warda pa sinta tras di e monitòrnan i vigilá”.
Bremer ta enfatisá ku si CAP no ta kapás pa hèndel ku seguridat anto gobièrnu mester intervení den esaki, ya ku pa lei seguridat di aeropuerto ta kai bou di responsabilidat di gobièrnu.
Na kontinuashon un reportahe amplio di Jose Manuel Dias riba seguridat na aeropuerto Hato