Gay di pelea cla pa wordo pisa. Foto: Ariën Rasmijn

Gay di pelea cla pa wordo pisa – foto: Ariën Rasmijn

ORANJESTAD — Enforsa prohibicion riba pelea di gay na Aruba no ta un prioridad di maneho di Husticia. Esaki minister Arthur Dowers di Husticia a duna di conose ayera durante conferencia di prensa semanal di conseho di minister.

 
E mandatario a reacciona cu esaki riba anuncio di comisario Trudy Hassell cu pronto lo bay cuminsa actua contra pelea di gay y sera e galleronan cu pa hopi aña caba ta activo na diferente luga na Aruba.

 
Motibo pa esaki ta pasobra e practica ta prohibi y e ta wordo considera como abuso di animal. Dowers di su banda a duna di conose cu e mes como minister no tin un opinion riba plan di comisario Hassell. “Tur cos cu ta prohibi, polis tin autoridad pa actua contra dje”, segun minister Dowers. E pregunta ta mas tanto si esaki mester ta un prioridad siendo cu tin otro asuntonan manera trafico y criminalidad entre hobennan cu ‘ta hasi daño na ser humano’ segun e mandatario y mester keda haya tur atencion di Husticia.

 
Polisnan envolvi
A mustra riba ponencia di comisario Hassell cu den propio Cuerpo Policial mes tin funcionarionan cu ta envolvi den gallero, algo cu te ainda ta prohibi den Algemene Politieverordening (APV). Minister Dowers ta haya cu e ora ey caminda di cana ta esun disciplinario. ” Si bo bisa A, bo tin cu bisa B tambe.” Minister Dowers ta bisa cu nunca el a yega di tende di problema cu lo a surgi pa via di pelea di gay.

 
Autor: Ariën Rasmijn