E personal di kuido di Klínika Taams ta prekupá pa futuro di e hòspital – potrèt: Anneke Polak

E personal di kuido di Klínika Taams ta prekupá pa futuro di e hòspital – potrèt: Anneke Polak

WILLEMSTAD – Na promé instansha ta mustra manera no tin masha ta pasa na Klínika Taams. Tin un rei di pashènt na resepshon, enfermero i médiko ta kana riba e tereno i e salanan di espera ta yen. Si bo sigui kana bai e departamento di medium care bo ta ripará ku a kita tur pañ’é kama. Henter e banda ei di e edifisio ta bashí.

 
Fatalidat ta drif manera un nubia pretu riba e hòspital privá aki. Ya pa añanan largu Klínika Taams ta traha ku pèrdida, pero awor malestar a bira asina pisá ku nan a pèrdè nan ‘goodwill’ serka bankonan i suministradónan. Ainda no a paga e 176 trahadónan e luna aki. “Mi ta bira masha tristu, mi ke sigui krese na Klínika Taams, nos ta trahando duru na nos kalidatnan”, kordinadó di kuido Sabrina Christina ta bisa.

 
Enfermera Ruthmila di e departamentu di medium care tambe ta emoshonal. “Esaki ta nos pan. Kòrsou su komunidat ta grandi, nos ta un brasa di hòspital grandi, un hòspital so no ta basta.” Tur dos e enfermeranan tin miedu ku e kalidat di kuida lo bai atras i ku lo bini listanan di espera mas largu.

 
Tenementu di buki
Coromoto Maria, presidente di e sindikato di kuido CBV ta bisa ku Taams su problemanan ta falta di nan propio direktiva. Lo a graps plaka. Kardiólogo Arthur Liqui Lung, miembro di direktiva ta bisa ku for di e bukinan a sali ku direktiva no a kue plaka sino a hinka plaka aden. Aktualmente tin un investigashon ta kore. “Último añanan nos mes no a haña salario di Taams. E problema finansiero di e klínika ta ku diestres aña largu no a subi e tarifanan.”

 
Tarifanan
Direktor médiko Earl Esseboom no ta komprondé nada di e argumento. Taams komo organisashon privá mes mester mira pa nan solushoná nan problemanan. Ku e tarifanan obligatorio di gobièrnu bo no por hasi mashá, e ta bisa. “Diestres aña kaba Klínika Taams mester kobra e mésun tarifanan, miéntras ku e gastunan di kuido si a oumentá den e tempu ei. Ta un situashon insoportabel ku pa añanan kaba ta papia di dje i ta rekonos’é, ma no ta solushon’é”, Esseboom ta bisa .

E departamentu di medium care kaminda tin pashènt ku mester di hopi kuido, a sera

E departamentu di medium care kaminda tin pashènt ku mester di hopi kuido, a sera

 
Novèmber último a subi e tarifanan di operashon di wowo despues ku e klínika a menasá di para e tipo di operashon aki. “Di repente e ora ei sí nos por a subi e tarifanan aki, i ku esaki gobièrnu bon mirá ta indiká ku e tarifa tur e añanan ei tabata muchu abou. Nos no por kalkulá ku forsa retroaktivo i e pèrdidanan ta sinta den e forsa retroaktivo aki.” Esseboom ta spera ku durante e Konseho di Ministernan djarason lo primintí ayudo. “Si no tin trahadó den kas nos no tin otro moda di hasi, nos mester sera.”

 
Lista di espera mas largu
Seramentu lo ta hopi malu pa kuido Liqui Lung ta bisa. “Pa e pashèntnan poliklíniko tin lista di espera kaba. Urologia, ortopedia i neurologia tin un lista di espera di lunanan. Si bo wak e pashèntnan klíniko, no tin sufisiente espasio pa atmishon. E kapasidat di Sehos i Advent no ta basta segun mi. Lo bini un problema mas grandi ainda ora nos bai Hòspital Nobo, ku tin tiki kama. Esaki lo nifiká lista di espera mas largu, mas mandamentu afó pa kuido médiko i un baimentu atras di kalidat di kuido.”

 
Minister Ben Whiteman di Salubridat no tabata alkansabel pa komentario

 
Outor Anneke Polak