Minister Otmar Oduber como participante durante carnaval 2014. Foto: Ariën Rasmijn

Minister Otmar Oduber den parada di carnaval como participante e aña aki – foto: Ariën Rasmijn

ORANJESTAD — Despues di 60 aña, no ta bay duna mas permiso na Stichting Arubaanse carnaval (SAC) pa ta e unico organisador di Carnaval 61. Minister Otmar Oduber di Cultura a declara esaki ayera mainta.

 
Cu esaki e mandatario ta reacciona riba e carta cu el a haya di abogado di SAC den cual ta para cu e fundacion no ta bay di acuerdo cu su proposicion pa directiva di SAC entrega nan puesto y traha luga pa mas partidonan cu ta envolvi den carnaval.

 
Desde cu e edicion di e aña aki na unda a celebra 60 aña di carnaval, tin un conflicto entre 15 di e gruponan cu ta participa y SAC. Finalmente e minister di Cultura, despues di a anuncia cu e grupo cu e mes tabata lider di dje lo no continua mas, a cay aden pa intermedia. Su proposicion final tabata pa directiva di SAC hala un banda y considera laga un triumvirato di nan mes, gruponan y gobierno organisa carnaval y bin cu un structura nobo. Si no lo conseha prome minister pa no otorga e permiso cu SAC so tabata haya 60 aña largo pa ta e unico cu ta dicidi y dispone riba eventonan di carnaval na Aruba.

 
E minister a declara cu no tin manera mas pa traha cu SAC, mirando cu 95 porciento die gruponan no kier traha cu e fundacion mas. Ayera tardi Oduber a reuni cu Gruponan Uni, representando 15 grupo di carnaval. Akinan e mandatario a puntra e gruponan si nan posicion a cambia y nan a duna di conose cu esaki no ta e caso.

 
Organisacion nobo
Poco despues di e reunion aki e gruponan mes a tene un conferencia di prensa den cual nan a reitera nan posicion. SAC lo a ofrece nan puestonan di comisario en bes di den directiva, y esaki no ta suficiente pa nan. Nan ta declara cu nan ta sostene minister Oduber den su plan pa bin cu un organisacion nobo cu lo bay ta encarga cu pone carnaval 61 riba pia. Ken lo mester tuma asiento den e organisacion nobo aki no ta dicidi ainda, pero Oduber ta bisa cu Departamento di Cultura, gruponan di carnaval y Cuerpo Policial sigur lo ta representa. E minister ta bisa cu e ta garantisa cu dia 11 di november pa 11’or di mainta – e comienso tradicional di temporada di Carnaval – tur cos lo ta cla pa ranca bay. Te hasta ya caba lo tin un plan riba mesa pa logra esaki na ora.

 
Corte
A puntra e mandatario si ta tuma cuenta tambe cu e posibilidad cu SAC lo entama un caso contra gobierno, algo cu abogado di e fundacion a bisa cu lo haci si no otorga permiso. “Lo cruza e brug ora yega eynan”, tabata e respuesta di minister Oduber. Si acaso hues duna SAC razon unabes cu nan hiba gobierno corte Gruponan Uni lo no participa den carnaval, lagando carnaval practicamente cu dos grupo den nan parada so. “Nos no kier pa esaki yega asina leu”, asina por a compronde for di Gruponan Uni.

 
Carnaval di Aruba ta e evento mas grandi di aña pa e isla, socialmente y economicamente. Miyones di florin ta circula durante temporada aki y turismo ta depende grandemente di dje.

 
Autor: Ariën Rasmijn