Hefe di polis Maurice van Velzen
ORANJESTAD – E hefe nobo básiko di polis na Sint Eustatius Maurice van Velzen ke hasi su trabou na un manera habrí i aksesibel. For di promé di ougùstùs e ta manehá e kuerpo di polis riba e isla ku el a siña konosé komo un ambiente di trabou bunita, “ku un pueblo amabel, hospitalario i habrí.”
For di òktober 2010 ta manehá polis na Statia for di Boneiru. Esaki no a resultá di ta un bentaha tur ora. Espesialmente e difikultat pa haña kontakto ku polis tabata un keho grandi. Van Velzen ke pa semper por alkansá polis.
“Trabou di polis ta duna i tuma. Polis i pueblo mester tin un konekshon ku otro; un laso kaminda nos ta skucha otro. Mi ke drenta den kontakto ku pueblo i tende kiko ta nan prekupashonnan”, Van Velzen ta bisa. Ta for di Koninklijke Marechaussee a mand’é bin traha den e kuerpo di polis di Hulanda Karibense.
Resientemente Sint Eustatius a hañ’é konfrontá ku un ola di kiebro. Violensia doméstiko tambe ta tuma lugá regularmente. “E koleganan a traha duru pa trata di solushoná e kasonan di kiebro”, segun e hefe di polis nobo. “Pero ainda tin hopi trabou di hasi. Na final ta nos meta pa redusí kriminalidat.”
Sero toleransha
A nombra e hefe di polis pa un temporada di un aña. Den e aña aki e ke mehorá e sintimentu di seguridat den komunidat i e kalidat di kuido di polis. Un enfoke di sero toleransha pa loke ta abusu di mucha, prevenshon di kiebro i seguridat den tráfiko p’e ta puntonan klave. “Relatá na esaki enfátikamente nos lo pidi sosten i envolvimento di gobièrnu, skolnan, organisashonnan pa hubentut i di nos partnernan den e sirkuito hurídiko.”, van Velzen ta bisa.
Na kuminsamentu di e aña di skol nobo huntu ku e polis di bario el a bishitá Gwendoline van Puttenschool. Pronto nan lo bishitá otro skol na Statia. Despues polis ke palabrá ku direktivanan di skol kiko ta e nesesidatnan di skolnan i studiantenan pa duna nan e informashon i sosten nesesario. Ku permit di, i den koperashon ku e direktivanan di skol polis lo desaroyá un programa di lès pa duna hubentut ku ta bai skol informashon i evitá insidente.
Kiebro
Van Velzen ta kontentu ku e éksito ku su tim a haña den relashon ku e kiebronan. Esaki ta danki tambe na e bon koperashon ku pueblo. Pasobra e kasonan ta kore ainda e no por konta detaye. Komo polis nos ke pa pueblo por keda aserká nos. Mi ta hasi un apelashon personal na komunidat di Statia pa aserká mi”, Van Velzen, ku tin 33 aña di eksperiensha serka Koninklijke Marechaussee na Hulanda, ta bisa. El a traha entre otro serka brigada Zuid-Holland, un brigada responsabel pa protekshon di frontera den e area di Rotterdam.
Koperashon
Mi motivashon pa solisitá pa un funshon na Hulanda Karibense ta mi preferensha pa koperashon pafó di e kuadro direkto di Hulanda. Mi ta kere ku na Statia mi por siña hopi, i ku mi por trese hopi for di mi experienshanan anterior. Mi ta spera ku huntu ku e koleganan di warda di polis di Sint Eustatius nos por subi e nivel di servisio i seguridat riba e isla. Mi ta buska un koperashon mas estrecho tantu den KPCN ku serka e partnernan eksterno.”
Outor: John van Kerkhof