Aubert Wiels tabata satisfecho ku e kastigu ku a duna – potrèt: Jean Mentens
WILLEMSTAD – Elvis ‘Monster’ Kuwas a haña kastigu di bida largu pa tres asesinato, entre nan esun di e polítiko Helmin Wiels. Ko-sospechosonan Dangelo Damascus i Carlos Pieter a sali liber pa implikashon den e asesinato riba Wiels, pero ta kondená nan pa komplisidat na dos atrako i Damascus pa poseshon di arma tambe.
Ruman Aubert Wiels a reakshoná kontentu ku e kastigu di bida largu ku a duna e tiradó Kuwas. Wes Constantijn van Dam van Isselt: “Korte ta konsiderá e sospechoso komo sin miserikòrdia, sin konsenshi i kapas di mata atrobe sin mas. Pesei mester protehá komunidat kontra e sospechoso den forma di dun’é kastigu di bida largu.” Kuwas mes no tabata presente na e seshon, pero a sigui e sentensia via un konekshon di vidio na Hulanda.
E deklarashon komprometedor ku Monster a duna kontra Damascus i Pieter, wes no a konsiderá sufisientemente pruebá pa Ministerio Públiko (OM). Tur dos e sospechosonan lo a fasilitá paña i number di outo falsu, pero segun wes no a hasi esaki aseptabel. Pieter despues di e seshon a drei wak su amiga riba tribuna ku un kara kontentu. A konden’é solamente pa komplisidat na un atrako, ku redukshon di aresto preventivo. OM a pidi sinku aña pa Pieter.
Ocho aña di sèl
OM a akusá Damascus tambe di e asesinato di Raul Martinez, mihó konosí komo Bolle, ku lo a stür e outo ku a usa pa kometé e asesinato. Wes a indiká ku di niun manera no a prueba e asesinato aki i a apsolbé Damascus di esaki tambe. El a haña ocho aña den sèl sí pa dos atrako armá i pa poseshon di arma i bala. OM a eksihí binti aña kontra dje.
Outor: Anneke Polak