Gilbert Isabella | Potrèt: Jamila Baaziz
UTRECHT – Awe Gilbert Isabella ta kuminsá komo representante nobo di reino pa Boneiru, Sint Eustatius i Saba. “Un trabou di soña kuné ku ta aparesé bo dilanti un biaha so den bo bida”, segun e èks wethouder di Utrecht di orígen kurasoleño.
Isabella ta bai sigui su propio rumbo i enfátikamente no ke laga asuntunan di den pasado influensh’é. E promé señalnan ku e ta tuma esaki hopi na serio – i ku e no ke un toren di ivor – t’ei kaba. Asina den promé siman na Boneiru mésora e ta kuminsá ku lès di papiamentu pasobra: “Mi ke por papia mas lihé posibel ku tur hende na Boneiru tambe.”
‘Na sèptèmber e ta start no solamente na su ofisina na Boneiru, sino mésora e ta drenta aden ku tur tres e islanan di Hulanda Karibense. E promé siman e ta na Boneiru, despues e ta bai pasa un siman na Sint Eustatius i djei mésora e ta sigui ku un siman na Saba. “Pa asina mi sa kon e bida diario ta einan. Esei ta bira e base. Despues mi ke pasa regularmente pa mantené mi konosementu di e lugánan i papia ku e hendenan.”
Papia i sa
Papia ku gobièrnunan insular, ku organisashonnan, ku habitantenan di e islanan i ku e ministerionan na Den Haag, esei Isabella ta mira komo un tarea ku lo tuma hopi tempu. “Mi ke sa bon bon ta kiko ta pasando na e islanan, pa asina mi por determiná kon por konektá nan. Mi ke sa di kiko ta trata, ki opstákulo tin i pakiko ta papia kos manera ta papia nan.”
Isabella gusta aktua spontáneamente si e ke sa algu i e no ta warda te ora bin trese e informashon seka dje. Pesei boneriano, stasiano i sabano no mester keda straño ora e djis pasa un be. Na Utrecht nan konos’é komo e wethouder ku ta yama bisa ku aki mei ora e ta pasa ku baiskel p’e bin tende por ehèmpel ta kiko ta pasando den un sierto bario. “T’asina mi ta”, e ta bisa.
Representante di reino
Representante di reino espesialmente ta esun ku ta uni, segun Isabella. “Si bo wak e kos simbólikamente e ta habri su mannan tantu pa Den Haag komo pa e gobièrnunan di e islanan pa asina konekta nan.”Su eksperiensha amplio di trabou ku ta varia di trahadó sosial te wethouder di planifikashon espasial i di lider di proyekto di maneho di antiano te sekretario di un konseho di asesoramentu ekonómiko ta salié ‘di bon’ den e funshon nobo aki.
Pa e representante di reino nobo ta klaro ku e problemanan i deseonan di Boneira, Statia i Saba ta diferente. “Esei ta mi punto di salida. Ta tres isla kada un ku su propio manera di biba i hasi, ku nan propio problemanan i oportunidatnan. Mi ta mira nan komo tres diferente área kaminda semper lo mi wak kiko ta pasando i kon nos por pone man na obra pa solushoná problema i usa oportunidatnan.”
Krítika i polítika
E krítika pisá riba su nombramentu i e rechaso unánimo di e mandatarionan na Statia e no ta tuma na pechu. “Natural nunka no ta agradabel espesialmente pasobra mi tabata na Hulanda i mi no por a reakshona adekuadamente. Pero ora na ougùstùs m’a hasi un bishita kòrtiku na e islanan, na Statia tambe mi a haña un invitashon kordial pa bini bèk atrobe na sèptèmber. Tin be bo mester topa otro personalmente prome i wak den otro su wowo. A papia konstruktivamente ku tur mandatario. Mi ta komprondé si ku hende ta krítiko i ta pensa: ta ku ken nos ta haña nos awor atrobe?”
Isabella no ta ferwagt niun tiki difikultat pa tuma despedida di su pasado polítiko komo miembro di PvdA. PVV i algun mandatario di e islanan tabata abiertamente prekupá p’esaki. “Mi tabata polítiko i awor no mas. Mi ta para riba e partidonan.”
E ta pensa ku e por keda leu tambe for di e kontroversianan polítiko riba e islanan ku – espesialmente na Boneiru – regularmente sa eskalá. “Komo representante di reino mi no ta bai tuma un koló polítiko. Mi no ta bai mete den polítika di partidonan, sino mi ke tende e puntonan di bista di tur partido.”
Manehá pobresa
Isabella ta mira e maneho di pobresa, desempleo, ònderstant abou i preis haltu riba e islanan komo un punto di atenshon importante e añanan binidero: “Natural tur gobiernu di e islanan tin un tarea importante independiente den e asuntunan aki pero Den Haag tambe ta hunga un papel. I fortunadamente na Den Haag nan ta realisá mas i mas ku mester manehá esaki. Tur hende ku traha riba esaki – gobièrnunan insular i e hendenan na Den Haag – lo haña mi na nan banda.”
Futuro
Isabella ta haña e pregunta kiko e lo ke mira komo echo heroiko na su despedida komo representante di reino difísil pa kontestá: “Mihó mi kuminsá promé. Pero si mi por a kontribuí algu na mehorashon di desaroyonan sosial i ekonómikoriba e islanan, un dia mi por sigui ku un kurason sosegá.”
Outor: Jamila Baaziz