Gilbert Isabella – potrèt: Belkis Osepa
KRALENDIJK – Representante di reino Gilbert Isabella ke promové uso di papiamentu mundialmente i kontribuí na uso korekto di ortografia di papiamentu. Pesei Rijksdienst Caribisch Nederland (RCN, Servisio di Reino di Hulanda Karibense, trad.) a sera un akuerdo ku Fundashon pa Planifikashon di Idioma (FPI) pa desaroyá un chekeo di ortografia nobo pa papiamentu.
Isabella a bisa esaki na kabamentu di un workshop pa miembronan di prensa riba Dia di Prensa. RCN ta hiba un maneho di tres idioma i ta komuniká na hulandes, ingles i papiamentu na Boneiru, Saba i Sint Eustatius.
Windows
Generalmente tin hopi nesesidat di un vershon nobo di e chekeo di ortografia pa papiamentu. No por usa e vershon bieu ku e vershonnan nobo di Windows. Isabella: “Ku e chekeo di ortografia aki lo ta fásil pa tur hende ku ta usa papiamentu pa trabou of estudio kontrolá e ortografia korekto.”
Asina e chekeo di ortografia nobo ta riba merkado e lo bende pa un suma chikitu. Segun Isabella e ganashi lo bai FPI, ku lo usa e plaka pa promové papiamentu mas aleu.
Outor Belkis Osepa