Situashon di trafiko riba Caracasbaaiweg – potrèt: José Manuel Dias
WILLEMSTAD – E kambionan ku e departamento di Obranan Públiko (DOW) a hasi último tempu den nos infrastruktura di kayanan, no ta kumpli ku reglanan i no ta karga ku aprobashon di Kuerpo di Bombero i Fundashon Kuido di Ambulans. Asina e instansianan aki a duna di konosé.
Ambos instansia ta di opinion ku DOW ta hasiendo kayanan mas smal sin tene kuenta ku e aspekto di aksesibilidat ku ta di sumo importansia pa e servisionan di emergensia manera polis, brantwer i ambulans. “Segun reglanan di brantwer e kayanan mester ta mas o ménos seis meter hanchu anto si ke hasi nan mas smal nan mester bira mínimo kuater meter hanchu”. Esaki pa evitá ku ta stroba e fluho di tráfiko di akuerdo ku James Wilson enkargá ku parti preventivo di Kuerpo di Bombero.
Caracasbaaiweg
Diariamente shofùrnan di ambulans i brantwer ta keda konfrontá ku situashonnan den tráfiko ku ta stroba nan di duna e asistensia den e tempu preskribí. Un di e ehèmpelnan ta e situashon na Caracasbaaiweg kaminda a hasi e kaya mas smal i a planta palmanan na ámbos banda di kaminda. Anto komo si fuera esaki no ta poko a planta palunan riba e bèrm meimei tambe.
Un reportahe di José Manuel Dias tokante aksesibilidat di servisionan di emergensia