Barkunan di fruta venezolano - José Manuel Dias

Barkunan di fruta venezolano – José Manuel Dias

WILLEMSTAD – Por lo pronto konsumidónan di Kòrsou lo mester konformá nan mes sin tomati riba nan menú. Esaki despues ku un biaha mas e barkunan di fruta venezolano a keda sin trese e produkto aki pa motibu di un prohibishon. Aparte di tomati tin mas fruta i berdura ku tambe ta skars aktualmente na Kòrsou.

Ta mitar di dies di djaweps mainta i por mira trùknan di diferente supermerkado riba Kleine Werf na Scharloo en espera di nan pedido di fruta i berdura. Kada dos dia tin mas o menos shete barku venezolano ku ta bin abastesé e merkado di Kòrsou ku fruta I berdura segun pedido. Despues di mas o ménos un ora porfin e barkunan a kuminsá deskargá i e supermerkadonan por a haña nan merkansia den presensia di funshonarionan di Duana. Mangusa Supermarket komo e supermerkado di mas grandi tabatin un total di sinku trùk pa karga.

José Manuel Dias den kòmbersashon ku Antonio Pita i Willy Camacho tokante skarsedat di fruta i berdura

Kòrsou ketu bai sin tomati
“E biaha aki atrobe e barkunan venezolano a keda sin trese tomati. Ya tin dos siman ku Venezuela a prohibí eksportashon di tomati pa Kòrsou” Asina Antonio Pita enkargá ku transporte di fruta I berdura pa Mangusa a remarká. E prohibishon tin di haber ku kasonan di kontrabanda ku a keda detektá i ku ta okashoná skarsedat di produktonan na Venezuela. “Problema ku kosecha di tomati okashoná pa temporada di awaseru tambe ta un di e motibunan”. Esaki di akuerdo ku bendedó di fruta, Willy Camacho, kende tin 30 aña ta traha komo bendedó ambulante na e barkunan di fruta venezolano.

Importashon for di otro país
Un opshon ta pa importá fruta i berdura for di otro país manera Colombia, Republika Dominikano òf Merka . Hasiendo esaki nos ta bira menos dependiente di e situashon na Venezuela pero di otro banda nos mester bai paga mas pa fruta i berdura pa motibu di e kosto di transporte. Den pasado gobièrnu i komersiantenan lokal a yega di eksplorá e posibilidat aki pero sin ku esaki a resultá den un solushon struktural.

Prohibishon di importashon
Aparte di tomati tin mas fruta i berdura ku tambe ta skars aktualmente na Kòrsou. Ta trata aki di yuka, promentón, promènte pika, kòmkòmber salada i batata dushi. Pero segun Antonio Pita e skarsedat di e produktonan aki no tin nada di haber ku Venezuela. “Ta e departamento di asuntonan ekonómiko di Kòrsou a introdusí un prohibishon pa importá e produktonan aki. E intenshon tras di esaki ta pa protehé produkshon lokal pero realidat ta mustra ku no tin sufisiente produkshon lokal pa abastesé merkado kompletu”.

Solushon riba nivel diplomátiko
Lider polítiko i alabes parlamentario pa partido PAR, Zita Jesus-Leito, ta preokupá pa e asunto di prohibishon di produktonan for Venezuela i a dirigi un karta na gobièrnu den kual ta pidi pa buska un solushon riba nivel diplomátiko. “Esaki ta algu realmente alarmante i nos mester sa ta kiko ta pasando”

Banda di tomati tin un prohibishon tambe riba piská fresku kaminda ya pa varios dia no tin barku ta tresiendo piská for di Venezuela.

Outor José Manuel Dias