Hóbennan Boneriano ta laga blas bula bai – foto Belkis Osepa
KRALENDIJK – E selebrashon tradishonal di Dia di Boneiru tabatin komo liña kòrá union komo tema i tambe e yamada pa komportá komo shen porshentu Boneriano. Durante e reunion speshal di konseho insular por a tende yen palabranan bunita pa logra union.
Tòg por ripará ku e union no tei por kompletu den konseho insular, despues ku partido di koalishon di mas grandi (UPB) no a firma un deklarashon di union di oposishon (PDB) ku e kontenido pa organisá un referèndem. Un mayoria chikí a firma e deklarashon entre nan Rafael Santana, tambe partner di koalishon.
Imigrante
E loke a yama mas atenshon durante e selebrashon di Dia di Boneiru tabata e yamada di gezaghèber Edishon Rijna i tambe diputado Jona Chirino-Felida pa ta ‘shen porshentu Boneriano’. E gritu a haña apoyo serka algun presente. Pero otronan tambe a kuestioná esaki. Speshal imigrantenan i siudadanonan ku no a nase i lanta na Boneiru ta parse ku ‘shen porshentu Boneriano’ no ta konta pa nan.
E gritu por mustra riba un divishon den komunidat Boneriano, asina tin hende ta bisa. Chirino-Felida ta pidi su diskulpa si tin hende a intrepretá e gritu di shen porshentu Boneriano robes. No ta intenshon pa hasi distinshon. “Tur ku ta kontribuí na Boneiru ta shen porshentu Boneriano. Nos ta apresiá tur ku ta aportá. No ta e intenshon i pensamentu pa trese divishon. Nos ta papia di union”, segun Chirino –Felida.
Outor Belkis Osepa