Sehos no tin sufisiente espasio pa kuido poliklíniko
WILLEMSTAD – Spesialista médiko ta mira pashènt hopi mas den nan práktika privá ku den poli di Sint Elisabeth Hospitaal (Sehos). For di e último rapòrt di e Volksgezondheid Instituut Curaçao (VIC, Instituto di Salubridat Públiko Kòrsou, trad.) ta sali ku 83.7 porshento di e kontakto ku pashènt ta tuma lugá den e práktika privá, kompará ku 9.1 porshento den Sehos. Esaki ta sigur diessinku porshento mas ku binti aña pasá.
Cai Winkel, direktor médiko di Sehos, ta preferá di tuma tur spesialista den servisio pagá di Sehos pasobra pa saminá pashènt den práktika privá ta oumentá gastunan di kuido enormemente. “Aktualmente tur hende tin nan propio negoshi. Tin un diferensha grandi den e diferente salarionan di e spesialistanan médiko. Ta gastamentu di plaka pòrnada”, e ta bisa.
Na Hulanda for di 2015 spesialista no por deklará independientemente mas. For di yanüari esaki ta bai via hòspital, un manera pa supervisá e gastunan mas mihó. For di investigashon di e website Follow the Money a sali ku e spesialistanan na Kòrsou na 2009 tabatin un salario di un promedio di kuatershen mil florin. Tambe a bin sali ku e inigualdat ta grandi bou di e spesialistanan. Diessinku di nan tabata gana mas ku un mion pa aña, esakinan ta suma ku por pone hopi spesialista kumbre na Hulanda bira jalurs, asina Follow the Money ta skibi. Tin di nan asta sa di gana mas ku un mion so.
Lukrativo
Presidente di Vereniging Medische Specialisten Curaçao (VMSC, Asosiashon di Spesialista Médiko Kòrsou, trad.) Nena Abbad ta bisa ku no tin niun prueba ku bishita na práktika privá ta pone gastunan di kuido médiko subi. Pero e no por bisa si ta mas lukrativo pa spesialista mira pashènt den nan propio práktika. “No ta posibel pa bisa esaki ainda. E negoshashonnan mester kuminsá ainda”, ta su kontesta.
Mayoria di e plaka segun un rapòrt anterior di VIC ta bai pa kuido médiko speshalisá i kuido den hòspital, respektivamente 66 mion i 182 mion na 2011. For di 2009 e situashon di e edifisio i poli di Sehos segun Abbad ta “muchu malu” pa mira pashènt. “E echo ku e kantidat di konsulta a pasa di e edifisio di poli pa e praktikanan privá ta pa motibu di e sirkunstanshanan deplorabel ku tin den e edifisio for di 2009. Despues di un mantenshon grandi i renovashon ainda den poli no tin sufisiente espasio pa hopi specialista”, Abbad ta bisa.
For di e tempu ei a drecha e edifisio di poli pa 2.5 mion florin. A krea espasio pa diessinku spesialista, pero tin 110 spesialista ta traha na Kòrsou.
E pregunta grandi ta si lo tin sufisiente espasio den e hòspital nobo pa tur spesialista, ku for di 2016 mester funshoná bou di e nòmber Geïntegreerd Medisch Specialistisch Bedrijf (Kompania Médiko Spesialista Integrá). USONA, ku ta enkarga ku konstrukshon di e hòspital, no por bisa ku siguransa ku lo tin lugá pa tur spesialista.
Abbad ta konfirmá esaki: “Den e diseño a pone muchu poko espasio pa poliklínika. Berenschot/Ballast Nedam a presentá un diseño sin deliberá delantá ku esnan ku tin ku usa e espasio den futuro. E direktivanan di Staf Médiko di Sehos i VMSC ta hasi tur esfuerso posibel pa solushoná esaki.”
Ménos referensha
Segun dòkter di kas Wadib Elhage e problema ta kuminsá for di den kuido primario. Pasobra un pashènt no ta yega seka un speshalista sin ku un dòkter di kas a referié. Di tur referensha na 2013 23.7 porshente tabata pa bai spesialista.
Elhage i su koleganan di Huisartsenvereniging (Asosiashon di Dòkternan di Kas) ta boga pa fortifiká kuido primario, pa asina tin mester di ménos referensha. “Mester invertí pa fortifiká i train dòkternan di kas. Mester duna e kompensashon finansiero korekto pa e trabounan.”
E Asosiashon di Dòkternan di Kas a presentá un vishon amplio di kuido médiko na minister Ben Whiteman (Salubridat) i ta warda un kombersashon personal. Aki dos siman lo publiká e vishon riba kuido.
Outor: Leoni Leidel-Schenk