Victor Stott dunando informashon tokante studiamentu na Canada – pòtrèt José Manuel Dias
WILLEMSTAD – Studia na Canada por ta un opshon pa studiantenan di Kòrsou ku ke sigui un estudio riba nivel haltu den nos región sin ku esaki nesesariamente mester kosta demasiado sèn. Asina a sali na kla e siman aki for di un anochi di informashon ku Fundashon pa Finansiamentu di Estudio (SSC) a organisá konhuntamente ku representante di embahada di Canada na Caracas, Venezuela.
Kosto di estudio relativamente abou, universidatnan renombrá, seguridat i diversidat kultural ta algun di e bentahanan ku Canada tin pa ofresé i ku Victor Stott di embahada kanadés a bin promové bou di studiantenan di Kòrsou.
Interés hopi grandi
Segun kálkulo tabatin mas ku 250 studiante i mayor ku a akudí na e anochi di informashon tokante di studiamentu na Canada. Esaki ta duna un indikashon klaramente ku tin un interés hopi grandi bou di nos studiantenan pa eksplorá e opshon aki, di akuerdo ku direktor di SSC, Margrit de Freitas.