Polis na Boneiru – potrèt: Belkis Osepa

Polis na Boneiru – potrèt: Belkis Osepa

KRALENDIJK – Den Korps Politie Caribisch Nederland (KPCN, Kuerpo di Polis di Hulanda Karibense) tin un kultura di miedu enorme. Polis tin miedu di retaliashon i ta ekspresá nan mes solamente anónimamente, e presidente di e bònt di polis Charles Mercelina ta deklará. Un malkontentu ku ta oumentá mas i mas seriamente a brongosá hefe di kuerpo Hildegard Buitink.

E stashon di radio lokal Radio Digital a haña un karta anónimo ku a kousa hopi komoshon. Radio Digital a lesa e karta integralmente den transmishon, i despues tur sorto di alarma a kuminsá bati. Buitink a konvoká e bònt di polis pa un deliberashon di urgensha i awe nochi e bònt a papia ku su miembronan tokante e malkontentu ku ta reina.

Krítika pisá
Den e karta anónimo ku e título ‘Exodus’ Buitink ku tin un aña kaba ta traha komo hefe di kuerpo ta haña krítika písá. Ta papia di falta di rèspèt i konfiansa. Ta tira na su kara ku e no tin konosementu di kultura bonerianu. Ademas Buitink ta sin manera i e ta falta vishon pa progreso di e kuerpo. E eskritor(nan) anónimo ta bisa tambe ku Buitink ta faboresé otro polis – espesialmente hulandes oropeo – i ta komportá sin manera. Tambe a denunsiá e falta di konosementu di e kultura i idioma papiamentu serka e koleganan hulandes oropeo.

A papia tambe di e miedu bou di e polisnan bonerianu. “Asina e kana yega un kaminda tin miedu di dje. Esaki ta pa motibu di su komportashon i su mal karakter. Bo no por kritiká. Tin funshonario ku pa e motibu ei a bai. I tin hopi funshonario riba un ‘lista pretu’ ainda.” Den e karta tin un frase alarmante: “Nos tin e impreshon ku a mand’é aki pa debilitá e kuerpo di polis, pa asina e hulandesnan por tuma ofer.”

Hefe di kuerpo Hildegard Buitink – potrèt: Belkis Osepa

Hefe di kuerpo Hildegard Buitink – potrèt: Belkis Osepa

Huma i kandela
Pa finalisá tin pará de e karta ku lo aserká Ombudsman Nashonal, gezaghebber Edison Rijna i konseho insular. “Nos ta pidi Buitink pa tuma su retiru.” E sindikato di polis no por bisa si e karta ta binidero di seno di polis. “Simpelmente nos no sa. Ma esnan ku a skibié ta bon na altura si di kiko ta trata.” Mercelina ta bisa sí ku ‘kaminda tin huma tin kandela’. Mester manda e bala bèk pa Buitink. E mester sa kon el a komportá i analisá su propio komportashon. Si loke nan ta bisa no ta bèrdat e mester defendé su mes.”

E kultura di miedu bou di polis ta asina grave ku e sinkuenta polisnan presente durante e enkuentro di urgensha ku sindikato tabatin miedu di ekspresá nan mes. Mercelina: “Nos a puntra nan si nan ta sostené e karta òf nò. Niun hende no ker a papia abiertamente. Ta te ora ku nan por a skibi nan kehonan anónimamente riba un papel nan a bash’abou.” E bònt ta bai inventarisá tur e kehonan.

Komunikashon
Mercelina ta pertinente tokante un kos. E kultura di miedu serka polis mester disparsé. “E miedu no ta salú. Polis mester ekspresá nan mes i no anónimamente so. Nos mester skucha e echonan i dil ku nan. Komunikashon ta esensial, di parti di maneho di e kuerpo tambe. Nos mester trata i solushoná e problemanan aki huntu”

Buitink ta den deliberashon interno i ainda no por duna komentario.

Outor: Belkis Osepa