Hefe di kuerpo Hildegard Buitink – potrèt: Belkis Osepa

Hefe di kuerpo Hildegard Buitink – potrèt: Belkis Osepa

KRALENDIJK – Hefe di kuerpo di polis Hildegard Buitink ta tuma e krítika riba su persona serio i ta bai palabrá esaki ku personal di polis. Buitink ta reakshoná por eskrito riba e akusashonnan serio ku a ekspresá den un karta anónimo.

E akusashonnan ta trata di su komportashon, manera di traha, vishon i konosementu di kultura i idioma bonerianu. E karta ta papia di un partishon entre polis lokal i polis hulandes oropeo. E bònt di polis NAPB ta bisa ku bou di polis ta reina un kultura di miedu ku ta pone ku nan no por ekspresá krítika abiertamente.

Tempu
Buitink ta bisa ku ‘último temporada hopi kos a sosodé i ku a alkansá logro visibel den e lucha kontra kriminalidat’. “E kuerpo ta pasando den un profeshonalisashon. Esei no ta bai sin lucha i ta kosta tempu”, Buitink ta splika. “Ta palabrá e krítika ku personal.”

Retaliashon
Den e reakshon kòrtiku no ta bisa kiko tur a sosodé último tempu. Tampoko Buitink no ta aklará mas aleu e proseso di profeshonalisashon i e difikultatnan. Espesialmente e polisnan lokal ta indiká ku nan tin miedu pa retaliashon i ku nan ke keda anónimo. Buitink ta bisa ku ‘mester por papia abiertamente i transparentemente tokante e krítika’. “Asina e kuerpo lo bira mas fuerte.” No ta aklará kon ta bai logra e frankesa i transparensha den kombinashon ku e kultura di miedu den e kuerpo.

Outor: Belkis Osepa