Sholaika Cijntje dunando servisio na klientenan di Albert Heijn – pòtrèt José Manuel Dias
WILLEMSTAD – Por lo general empresanan ku a disidí di empleá klientenan di Fundashon Kontakto ta kontentu ku e prestashon ku nan ta risibí. E fundashon aki ta duna guia na hendenan ku un desabilidat mental leve i ta siña nan un fishi pa finalmente buska un trabou pa nan.
Direktor di Fundashon Kontakto, Samantha Daal, ta hopi satisfecho ku e akogida ku ta hañando serka empresarionan. “Di kada dies empresa ku nos aserká, shete ta reakshoná positivo”. Di mes no ta tur kliente di e fundashon por haña un trabou fiho ya ku esaki ta dependé di e tipo di negoshi i e spesialidat di e trabou.
Un reportahe di José Manuel Dias
Tin empresanan manera supermerkadonan ku no por tuma e hendenan aki den servisio pero si ta duna nan chèns pa yega na un entrada dor di laga nan yena saku pa kliente.
Un di e ehèmpelnan
Albert Heijn ta un di e ehèmpelnan kaminda diariamente sinku kliente di Fundashon Kontakto ta haña chèns pa yena saku. Sholaika Cijntje di 32 aña di edat ta hopi kontentu ku tur mainta e por yena saku na Albert Heijn i asina yuda kria su dos yunan ohochi.
Outor José Manuel Dias