Carlos Richardson ta gravemente heridá den intensive care – potrèt di archivo 2013 Today / Milton Pieters
PHILIPSBURG – Situashon den prizòn Pointe Blanche ta íntrankil despues ku Carlos Richardson a kometé un atentado riba Urvin Wawoe, mihó konosí komo rapper Nuto i lider di e guèn notorio di Koraal Specht ‘No Limit Soldiers’.
Aña pasá den apelashon a kondená Richardson pa 29 aña i nuebe luna pa dos asesinato, intento di asesinato, intento di homisidio i membresia di un organisashon kriminal. Ta bisa ku el a menasá Wawoe ku un pistol, pero e rapper a bini bèk p’e ku un machete improvisá i a heridá Richardson gravemente ku esaki.
Richardson ta den intensive care bou di kustodia di polis den Sentro Médiko Sint Maarten pero segun Ministerio Públiko (OM) e no ta den peliger di bida.
Arma di kandela
Despues di e konfrontashon entre Richardson i Wawoe a konfiská dos arma di kandela. Polis a kontrolá e prizòn riba arma i otro kontrabanda i a usa kachó tambe den e kòntròl aki. E listramentu aki a resultá den un kantidat alarmante di arma improvisá manera kuchú i machete. A haña un karson djabou di hende muhé tipo ‘g-string’ tambe.
Kokaina
Wawoe tin un sentensia di ocho aña. Na 2012 a gar’é ku kasi kuater kilo di kokaina. Korte a konden’é tambe pa labamentu di plaka i membresia di un organisashon kriminal.
Kastigu di bida largu
Presensia di Wawoe den Pointe Blanche tabata e motibu ku OM na Kòrsou a blòkia e traslashon di Dangelo Damascus, un sospechoso den e asesinato di Helmin Wiels, pa Sint Maarten. Damascus a hasi deklarashonnan kontra Elvis Kuwas, un miembro di No Limit Soldiers ku a haña kastigu di bida largu pa e asesinato riba Wiels.
Outor: Hilbert Haar