Shirley Treurniet – potrèt: Dulce Koopman
WILLEMSTAD- Misa di Koraal Specht ta funshoná sinku aña sin un pastor propio ku ta traha pa e misa. Mientrastantu tin hopi hende ku a pèrdè kontakto ku iglesia i kue un otro rumbo. Pero konseho parokial di misa di Koraal Specht ku durante dje último sinku aňanan a guia e misa i tur aktividat relashoná ku e iglesia na un manera formidabel ta determiná pa pone bèk riba bon ruta esnan ku a desviá for di iglesia. Esaki ta un dje metanan di selebrashon 40 aña misa di Koraal Specht 29 di sèptèmber awor.
Misa di Koraal Specht a keda tur e tempu sin un pastor spesífikamente pa e misa, debí na e skarsedat di padernan riba nos isla. Pastornan di turno ta hasi misa djasabra atardi i djadumingu mainta. Banda dje úniko dos servisionan di e misa na Koraal Specht, Konseho Parokial ta kordiná vários otro aktividat religioso. Misa di Koraal Specht ta hopi gustá pa otro parokianonan ku for di leu ta bishitá e misa pa atendé entre otro seshonnan di orashon.
Shirley Treurniet ta konta kon e situashon na Koraal Specht ta aworaki
Resientemente a tene un enkuesta den e bario ku e intenshon pa iglesia katóliko haňa mas kontakto ku e parokianonan. Konseho Parokial tambe ta na altura dje desaroyonan ménos positivo di último tempu na Koraal Specht i ta preokupá pa prinsipalmente e hóbennan. Ta pesei den e dianan benidero ta dediká atenshon na e grupo aki tambe.
“Nos mester spar e hóbennan pasobra ta nan ta futuro di e pais aki”, Shirley Treurniet a bisa ora ku el a referí partikularmente na hóbennan di Koraal Specht pero tambe na tur hóben di Kòrsou. “I nos no por sinta mira kon e hóbenan ta bai pèrdí. Tin mester di hopi hende pa yuda”.
Atenshon pa hóbennan
Gerald Chirino kende ta un koreógrafo internashonal tin pa algun tempu un proyekto hopi interesante pa e hóbennan dje bario aki. Pa medio di koreografia Gerald ta yuda e hóbennan, kende ku masha hopi entusiasmo i interes ta partisipá na e proyekto, subi entre otro nan outoestima. E proyekto di Gerald Chirino ta duna e hóbennan tambe konfiansia propio i ta konsentrá riba inteligensha dje hóbenan i nan ta siña nan karga nan responsabilidat.
Mientrastantu mas hóben ta interesá di tuma parti na e proyekto aki ku nan por sigui na Sentro di Bario di Koraal Specht.
Outor Dulce Koopman